Prinsipal gireklamo

CEBU, Philippines – Mga magtutudlo ug prinsipal sa Carmen Elementary School sa Toledo City gipasakaan og kaso diha sa Ombudsman for the Visayas tungod sa pasangil nga sa pagpaninda sud sa eskuylahan ug gipautang ang mga bata.

Ang mipasaka og reklamo mao ang magtiayong Diomedes ug Jocelyn Villar nga molupyo sa barangay Carmen, Toledo City ngadto sa buhatan sa Ombudsman for the Visayas sumala pa sa report sa Brigada News FM-Toledo.

Ang gireklamo mao sila si Carmen Elementary School Principal Herminigilda Malapitan ug mga maestra nga sila si Nancy Allarse sa grade 6, HELE teacher nga si Webina Jaranilla, Noene Perame sa grade 5 ug sila si Philine Carreon ug Filomena Tolentin sa grade 4.

Ang magtiayon nasagmuyo nga nakat-on na hinuon pagpanguha og kwarta sa ilaha ilang mga anak aron dunay ibayad sa utang nila sa mga magtutudlo.

Tungod sa gibuhat sa ilang mga anak, nagpangutana sila sa ubang mga bata ug diha nila nasayran nga ang gipanghimo sa mga magtutudlo. Nasayran nga hasta mga bata gihimong tindera sa ilang mga maestro.

Giingong di pagawson sa classroom ang mga bata bisan og ting recess kay adto lang papaliton sa ilang maestra.

Ang rason kuno, healthy foods ang ilang baligya kon itandi sa gipamaligya diha sa gawas. Ini og kahapon, dili dayon papaulion ang mga bata hangtud di mahurot ang dala nilang paninda ug gani ipugos kini og pautang sa mga bata. Duna say mga bata nga misumbong nga dunay maestra nga pakopyahon sila sa blackboard sa tibuok klase samtang kini magkalingaw og duwa sa iyang dala nga laptop.

Ang maong prinsipal kusganong mihimakak niini ug nagtuo nga ang hinungdan niini mao ang pagpasirado niya sa gate.

Niadtong Septiyembre 5, 2014, gihusay sa Department of Education (DepEd) Toledo City Schools Division Superintendent nga si Roland Gutay uban nila Remedios Alfante ug North District Supervisor Chona Juares ug ang maong mga opisyal nakakita nga nakahimo g’yud og kalapasan ang maong mga magtutudlo.

Ang prinsipal nga si Malapitan ug si Perame nangayo og pasaylo sa mga reklamante ug kalimtan na lamang ang nanghitabo. Apan ang magtiayon miduso gihapon sa ilang reklamo ngadto sa Ombudsman. - /EIM) (BANAT NEWS)