Taga Batangas ang gi-ambush
CEBU, Philippines- Padayon pa nga giila sa kapolisan sa lungsod sa Balamban kung kinsa ang mipusil sa duha ka lalaki nga sakay sa usa ka motorsiklo diin usa niini patay ug ang usa kritikal ang kahimtang sa sitio Subida, barangay Vito.
Matud ni PO1 Alexander Camoro sa Balamban Police Station nga nahinabi sa Banat News nga hangtud karon wala pa sila’y kompletong pangalan sa namatay nga gitawag lang gihapon sa pangalan nga Jason.
Apan gitug-an ni Camoro nga ilang nasayran nga taga barangay Makalamlam, Batangas ang biktima ug gisuwayan na pagkontak ang pamilya.
Sumala pa ni Camoro nga ang mga kauban sa namatay nga nagtrabaho sa usa ka farm ang dili usab makahatag sa apelyedo sa namatay gumikan kay Jason ra ang ilang nailhan.
Usa karon sa gikontak sa kapolisan ang tag-iya sa farm nga gikatahong tua sa Manila aron makakuha sila og kumpletong pangalan ug pinuy-anan sa namatay.
Giangkon ni Camoro nga naglisud sila sa pagtumbok og kinsa ang mihimo sa krimen ug ang pangalan nga ilang nakuha gikan sa libro sa kauban ni Jason nga si Ritchel Fuentes nga kritikal ang kondisyon ang dili pa gyud nila matumbok nga suspetsado.
Usa sa ilang gipaabot nga makahatag og pamahayag si Fuentes alang sa katin-awan sa panghitabo.
Taho nagkanayon nga posibleng duna’y nasuko sa mga biktima gumikan kay gibuhian lang nila ang ilang mga hayop ug bisan asa lang kini maabot nga makamugna og kadaut sa mga tanum. - /GMR) (BANAT NEWS)
- Latest
