Biktima apil gisikop

CEBU, Philippines - Nadakpan hinoon ang usa ka biktima sa carnapping dihang nisumbong sa kapolisan sa dakbayan sa Talisay tungod kay may warrant of arrest kini sa kasong pangawat.

Ang gidakop mao si Apolinario Cabardo Tolibas, 36, taga lungsod sa Minglanilla kinsa misumbong unta nga gidagit ang iyang motorsiklo sa mga suspek nga sila si Dondel Panilagaw, 31, ug kapuyo niining si Elaine Restauro, 36, parehong nagpuyo sa Sitio Molave, Tabunok, dakbayan sa Talisay.

Si Tolibas nag-snacks niadtong higayuna ug wala makabantay nga gidagit na sa mga suspetsado ang iyang motorsiklo hinungdan nga nangayo siya og panabang sa iyang mga higala ug paryente sa pagpangita.

Giingong diha sa may Sitio Nonoc, Tabunok, dakbayan sa Talisay nakita nila ang mga suspetsadong nagtinabangay og handos sa motorsiklo.

Daling gidakop ni Tolibas ug sa iyang mga kauban ang mga suspetsado ug ilang nabawi ang XRM 125 nga motorsiklo nga nagtangag sa plakang 7293-XW.

Si PO3 Benedicto Lasque nga nahinabi sa Banat News kagahapon mibutyag nga dihang ilahang gisusi ang record ni Panilagaw ilahang nasuta nga si Tolibas dunay warrant of arrest sa kasong theft sa dakbayan sa Sugbo hinungdan nga ilang gisikop. Si Regional Trial Court (RTC) Judge Raphael Yrastorza sa Branch 14 maoy ni-isyu sa warrant of arrest batok kang Tolibas niadtong Hunyo 25, 2014.

Si Tolibas, Panilagaw ug Restauro ang parehong gitanggong sa selda sa kapolisan. (BANAT NEWS)