Tulo ka ‘level 2 pushers” nadakpan
CEBU, Philippines - Nasikop sa buy-bust operations sa kapolisan ang tulo ka gikatahapang level 2 drug pushers sa dakbayan sa Sugbo ug Lapu-Lapu. Ang Regional Intelligence Division-7 ang nakasikop kang Christopher Nacorda Anticristo, 39, minyo, taga Ubca II, Quiot, dakbayan sa Sugbo.
Matud ni Sr. Supt. Conrad Capa, deputy director sa Police Regional Office-7, nga human sa pipila ka semana nga pagpaniid, ila ra nga nasikop si Anticristo.
Nakuha gikan sa dinakpan ang 12 ka medium sized ug 168 ka gagmay nga pakete sa shabu, usa ka .38 revolver nga dunay tulo ka bala ug kwarta nga P3,280.
Sa pagpakighinabi sa mga tigbalita ngadto sa dinakpan, iyang giangkon nga iya ang maong mga drugas apan iyang gilimod ang armas nga nakuha. Matud sa hepe sa City Intelligence Branch, Supt. Romeo Santander, nga nasikop na nila kaniadto si Anticristo apan nakagawas gumikan sa technicalities sa kaso. Samtang dakung kantidad sa shabu ug armas ang nasakmit gikan sa duha ka gikatahapang level 2 drug pushers sa Basak, dakbayan sa Lapu-Lapu.
Ang nadakpan mao sila si Osama Abubakar, 30 ug Elmer Soriano, 44 , pulos nagpuyo sa maong dapit.
Nasakmit ang dagkung pakete sa shabu nga nagkantidad og P125 mil ug kalibre .45 nga armas.
Si PO2 Clarito Amistoso sa CIB sa Lapu-Lapu City Police Office (LLCPO) miingon nga gisulayan nila sa pagpalit og shabu sa ginagmay lang hangtud misugot nga mopalit na sila sa daku na nga kantidad.
Matud ni Amistoso nga nagkantidad og P16 mil ang ilang gipalit nga shabu ug budol nga kuwarta ang ilang gigamit nga may tinuod P500 ang ibabaw niini. – /GMR (BANAT NEWS)
- Latest
