Tulo ang patay sa pagpamusil

CEBU, Philippines - Tulo ka tawo ang patay samtang usa ang naangol sa managlahing pagpamusil dinhi sa Sugbo. Patay  ang kawani  sa City Treasurer's Office sa siyudad sa Lapu-Lapu human gipusil sa duha ka mga tawo nga nagsakay og motorsiklo sa may Mantawi Road, Sitio Langub, Barangay Poblacion sa dakbayan sa Lapu-Lapu. Ang biktima giila nga si Shirali Basan, 42, taga barangay Sta. Rosa, isla sa Olango sa nahisgutang siyudad.

Matud ni Senior Inspector Zenaido Pastorfide sa Homicide Section sa Lapu-Lapu City Police Office nga ang biktima sakay sa iyang motorsiklo paingon na nga mouli dihang ni-overtake ang mga mamumuno ug gipusil ang biktima. Way nakaila sa mga mamumuno nga pulos nagsuot og full-faced helmets. Nakuha sa crime scene ang lima ka basiyo sa kalibre 45 nga bala.

Samtang patay usab ang fish vendor sa Sitio Fatima, Barangay Basak, Dakbayan sa Mandaue nga  si Marlon Bantolinao human kini gipusil  ni Rigor Salazar, 28, taga Barangay Buhisan, Dakbayan sa Sugbo.

Si SPO1 Edmund Belacora sa kapolisan   sa Presinto  3 sa Mandaue City Police Office (MCPO) miingon nga naglingkod ang biktima dihang giduol sa suspek ug gipusil luyong bahin sa ulo niini.

Apan sa paglanog sa buto sa armas naratol ang backup niini nga nagpaabot sa motorsiklo ug mipasutoy og padagan padung sa direksyon sa Consolacion.

Ang suspetsado nga nabiyaan nagdali na lang og sakay sa usa ka PUJ apan nasugatan hinuon niini ang mga sakop sa Presinto 3 nga midakop kaniya. Nakuha gikan sa suspek ang .38 kalibre rebolber, ug giingong mitug-an kini nga duna ray misugo kaniya pagpatay sa biktima.

Samtang gibulit og bala ang kalawasan ug giduslak pa gyud og talinis nga hinagiban ang iyang mga mata sa iyaha rang nakaaway nga paryente diha sa Barangay Don Andres Soriano sa dakbayan sa Toledo. Si Jay-r Basay, 26, nakaangkon og tulo ka samad pinusilan sa nagkadaiyang parte sa lawas ug giduslak pa ang mga mata niini sa suspek nga si Clemente Capa, 50, nga iyaha rang paryente.

Matud sa hepe sa barangay tanod sa DAS (Lutopan) nga si Boy Taneo giduol sa suspek ang biktima ug gidul-itan pagpusil ang ulo, tangkugo ug sa iyang tuhod.

Sumala pa nga gipatiran pa ug giduslak og hait nga butang ang mata sa biktima.

Sila si SPO3 Jose Dante Talandron ug PO2 Ian Alqueza sa Toledo City Police Station sa Lutopan sub-station nga miresponde nakapunit og unom ka bala sa kalibre 45 nga armas diin upat niini ang kabhang samtang duha ka bala ang wala makabuto. Pabilin pang gawasnon ang suspek hangtod ning tungora kinsa padayon usab nga gipangita sa kapulisan sa dakbayan sa Toledo. (BANAT NEWS)