Duha nakuryentihan natagak sa building, usa patay

CEBU, Philippines - Usa ang namatay  ug laing usa usab ang kritikal ang kahimtang human nakuryentihan sa Barangay Tabok, dakbayan sa Mandaue niadtong miaging Lunes.

Ang namatay mao  si Francisco Camangyan Jr., 24,  taga San Vicente Ferrer sa Barangay Tabok ug kritikal usab ang kahimtang ni Rolly Sagayle, 25 anyos nga usa ka welder nga lumad nga taga Dakbayan sa Davao ug stay in worker sa CITI Hardware nga nahimutang sa maong dapit.

Sila si PO1 Peter Judh Modoñedo sa kapolisan sa Presinto 3 sa Mandaue City Police Office (MCPO) nga maoy naghimo og pakisusi miingon nga nagtaud og atop sa extention building sa nahisgutang hardware ang duha. Apan giingong nahikapan ni Sagayle ang electric power supply sa VECO ug nalagpot kini kang Camangyan hinungdan sa ilang pagkakuryenti ug nangatagak 20 ka tiil paubos.

Ang duha nakaangkon og mga paso sa kalawasan ug gideklarar nga patay sa mga doktor sa Mandaue City Hospital si Camangyan. (BANAT NEWS)