Mahalong alahas, appliances sa doktor gihakot sa kawatan

CEBU, Philippines - Dili momenos P100 mil ang kantidad sa mga gamit ug mga alahas ang nadala sa mga kawatan nga nilungkab sa apartment sa usa ka doktor sa may dalan Junquera Extension, Santa Cruz, dakbayan sa Sugbo niadtong Sabado sa udto.

Giila ang biktima nga si Serah Saphira Allera, 27, dalaga, lumad nga taga Tigbao Talamban.

Si Allera mitug-an sa imbestigasyon ni SPO3 Sylvanus Abella nga sa dihang nahiuli siya gikan sa trabaho, mao nalang ang iyang naabtan nga abli na ang iyang apartment.

Nasuta nga sa main door miagi ang kawatan ug milahos sa ikaduhang andana diin nahimutang ang lawak ni Allera ug giguba ang lock sa pultahan.

Nakuha sa kawatan ang usa ka Smart TV 32 inches kantidad of P25 mil; Sony Xbox P20 mil; heavy duty mixer P25 mil; duha ka gold bracelets balor og P70 mil ug P40 mil pesos; gold necklace P40 mil; duha ka gold rings balor og P10 mil ug duha ka gold necklaces balor og P1,000 ug P4,000.

Sumala pa ni Chief Insp. Wildemar Tiu, hepe sa Fuente Police nga nahinabi sa Banat News nga posibleng duna’y kauban ang kawatan nga mikuha sa mga butang gumikan sa kadaghan nga nadala niini.

Bisan wala’y CCTV camera ang maong apartment, ang kapolisan aduna na’y gisundan nga posibleng suspek ug tukmang panahon lang ang ilang gipaabot. (BANAT NEWS)