Polis gireklamo nga nangulata sud sa presinto

CEBU, Philippines - Polis nga nadestino sa Talamban Police Station gireklamong nangulata og usa ka sibilyan  kagahapon sa kaadlawon sulod sa Talamban Police Station.

Sigun sa report, ang biktima mao si Jetro Soon, taga barangay Pulang Bato.

 Samtang ang gireklamo nga pulis mao si PO2 Joel Vergara, desk officer, apan off duty niadtong higayona.

Si Senior Inspector Bienvenido Miral nga nahinabi sa Banat News miingon nga nianang gabii nipahigayon og checkpoint ang iyang mga sakop ug naka-impound sila og upat ka mga motorsiklo.

Nasayran nga alas -3 sa kaadlawon gikuyugan ni Soon ang iyang higala sa Talamban Police Station aron pagsuta kun ang motor nga gi-impound anaa pa didto o gidala na sa laing impounding area.

Apan giingong kalit lang sila gisita ni PO2 Vergara nga gihulagway nga hubog adtong higayuna.

Diha sa sulod sa police station giingong gikulata ni PO2 Vergara si Soon ug giingong gi-butt stroke kini ug gitionan og armas sa walay igong hinungdan.

Giingong mihunong lang si PO2 Vergara sa iyang gibuhat human kini gibadlong sa opisyal nga si Senior Inspector Roy Manguilimotan.

Ang biktima giingong nakaangkon og bun-og sa bahin sa gusok niini hinungdan nga gi-awhag siya sa kapulisan sa Talamban nga magpakurasyon aron ipa-blotter ang nahitabo kaniya. Si Miral miingon nga adunay miscommunication nga nahitabo tali nilang PO2 Vergara ug Soon.

Matud pa nga si Soon nagsige og hupo-hupo sa police station hinungdan nga nagduda si PO2 Vergara nga adunay dautang plano maong gisita kini. Nagkanayon si Miral nga aduna nay kasinatian si PO2 Vergara nga nawagtangan og motorsiklo nga ilang gi-impound hinungdan nga sa dihang nakit-an si Soon nga nagsige’g hupohupo iya kining gisita.

Hinuon gimanduan na ni Miral ang iyang imbestigador sa paghimo og imbestigasyon sa hitabo ilabi na ang report nga giingong hubog ang maong pulis dihang nahitabo ang insidente.  (BANAT NEWS)