Bag-ong PRO-7 director nilingkod

CEBU, Philippines - Pormal na nga milingkod kagahapong adlawa isip direktor sa Police Regional Office-7 si Chief Supt. Prudencio Tom Bañas hulip sa kasamtangang naglingkod nga si Sr. Supt. Orlando Ualat.

Si Bañas gikan sa Human Rights Affairs sa Campo Crame apan nadestino na kini sa PRO-7 kaniadto isip hepe sa Regional Intelligence Unit (RIU).

Atol sa formal turnover ceremony kagahapon, si Bañas namahayag nga duna siya’y ipatuman nga mga bag-ong plano samtang dili na bag-o alang kaniya ang Sugbo.

Prayoridad ni Bañas ang pagpahugot pa sa pagbungkag sa ilegal nga drugas sa rehiyon, pagpatuman sa Patrol Plan 2030 sa kapulisan ug pag-atiman sa kalikupan.

Gipadayag usab sa opisyal ang kaandam sa pagpaluyo sa kapolisan sa Bohol nga nakabangga ang sindikato sa ilegal nga drugas. Samtang gipasalig usab sa opisyal nga andam siyang mohatag og promosyon sa iyang mga sakop nga makahimo og maayong mga buhat apan abtik usab siya nga modisiplina sa mga sakop nga maapil sa ilegal nga kalihokan.

Gidayeg niya ang mga naunang mga opisyal sa PRO-7 nga nakadawat sa Golden Eagle Award sa nakalabay nga tuig human napili ang PRO-7 nga aduna’y maayong performance ug nipasalig nga iyang ipadayon ang mga maayong nahimo. (BANAT NEWS)