Polis ug amigo nakuhaa’g drug paraphernalia, armas ug bala

CEBU, Philippines - Nasikop sa kapolisan sa dakbayan sa Sugbo ang duha ka lalaki lakip na ang usa ka polis atol sa saturation drive sa sudlonong bahin sa barangay Duljo-Fatima niadtong Biyernes sa gabii.

Gidakop sa Punta Princesa Police Station sila si Kenner Rodriguez, 21, sa Tres De Abril ug si PO2 Ronelo Manuel, 31 .

Ang maong saturation drive gipangulohan sa ilang hepe nga si Senior Inspector Michaelangelo Beltran. Nasakmitan si Rodriguez og kalibre .357 nga revolver nga may tulo ka bala ug kalibre .38 nga revolver nga walay bala.  Samtang unom ka bala usab sa kalibre .45 ug upat ka bala sa kalibre .38 ug drug paraphernalia ang nakuha gikan kang PO2 Manuel. Wa hinuon mobutyag ang kapolisan kun asa nadakpan ang duha ug kun asa nadestino si Manuel.

Ang mga suspetsado kasamtangang natanggong sa karsel sa maong police station samtang giandam pa ang kasong kalapasan sa Comprehensive Dangerous Drugs Act of 2002 ug Comprehensive Law on Firearms and Ammunitions nga ipasaka batok sa duha. (BANAT NEWS)