Forest rangers pabantayon sa kalasangan sa Manipis

CEBU, Philippines - Human sa kontrobersiya sa ilegal nga pagpamutol og kahoy didto sa Sitio Campensa, Barangay Manipis, dakbayan sa Talisay, ang kadagkoan sa Department of Environment and Natural Resources (DENR) giawhag karon nga destinohan og forest ranger ang mao nga lasang.

Gihangyo ni Konsehal Antonio Bacaltos Jr. si DENR Executive Director Isabelo Montejo nga butangan g’yud og mga forest rangers ang mao nga dapit aron dili masubli ang ilegal nga pagpamutol og kahoy.

Matud ni Bacaltos nga mandato sa lokal nga kagamhanan ang pagpreserbar sa ecological well balance sa kalikupan nga maprotektahan kini sa mga malapason sa balaod. Dugang ni Bacaltos nga ang dakbayan sa Talisay nagkinahanglan og kwalipikado ug highly trained nga mga tawo nga maoy mobantay sa watershed sa Sitio Campensa.

Labing minus walo ka dagko nga punoan sa kahoy ang gipangputol sa mga tawo nga naglakip ni Joel De los Reyes, igsoon ni Talisay City Mayor Johnny De los Reyes.

Ang DENR mitakda na gani nga mopasaka og buwag nga kaso’ng kriminal ug administratiba batok sa mga responsiable pagpamutol sa kahoy.

Matud ni Bacaltos nga ang pagpamutol og kahoy sa Sitio Campensa mapugngan unta kun dunay mga forest guard nga magbantay.

Si Mayor De los Reyes miingon nga ang pagpamutol sa kahoy didto sa Sitio Campensa gitumong aron dili makahatag og peligro sa mga tinun-an sa duol nga tunghaan sa Barangay Manipis. (BANAT NEWS)