Lolo nadakpan sa buy-bust

CEBU, Philippines - Usa ka 65-anyos nga lalaki nga maoy nagsustiner sa panginahanglan sa iyang mga apo nasikop sa mga sakop sa City Anti-Illegal Drugs Special Operations Task Group sa buy-bust operation sa miaging adlaw sa barangay Guba sa dakbayan sa Sugbo.

Ang nasikop naila nga si Asocino Soco human giingong mibaligya og usa ka pakete nga gituohang shabu nga balor og P200 ngadto sa operatiba sa CAIDSOT pasado alas dos sa miaging hapon.

Sa pagrekisa sa iyang bulsa gikatahong nakuhaan kini og dugang 16 ka gagmay nga paketeng may sud nga gituohang shabu.

Matud pa sa suspetsado nga way trabaho ang iyang mga anak ug naa pa gyud siya’y mga apo maong napugos siya sa pagbaligya og shabu.

Nangayo og pasaylo ang tiguwang ug misaad kini nga kun pasayloon di na gyud siya mobalik sa maong ilegal nga buhat. Matud pa nga ang customer sa suspetsado mga habal-habal drayber ug muabot ang kita niini sa P500 matag adlaw.

Miingon ang suspek nga sa wala pa siya maninda og shabu usa siya ka mag-uuma apan kay dili man paigo   ang income niya maong nagbaligya na lang siya og drugas. Mitug-an siya nga usa ka ginganlan og Diola ang iyang supplier.

Matud pa ni Sr. Insp. Eunil Avergonzado nga gipaubos nila sa surveillance ang suspek sulod sa duha ka semana una nila gihimo ang maong buy- bust operation. (/EIM)(BANAT NEWS)