Mibanhig sa kapitan ug konsehal nailhan na matud sa kapolisan

CEBU, Philippines - Gitoohan nga gibayran ra kadtong tawo nga mibanhig sa kapitan ug konsehal didto sa Barangay Capitan Claudio, dakbayan sa Toledo aron tipion ang duha ka opisyal sa barangay.

Si Kapitan Alexander Alqueza anaa pa gihapon sa ospital human siya ug si Konsehal Irene Wamilda gibanhigan nga misangpot pagkamatay sa konsehal kaniadtong Lunes sa hapon.

Si Chief Inspector Michael Anthony Bastes, hepe sa Toledo City Police Station, miingon nga iyang nahinabi si Alqueza ug gipakita sa mga hulagway sa mga suspetsado nga gun-for-hire ug iya nang nailhan ang lalaki nga nag-helmet nga mibanhig kanila.

Wala pa kaayo mohatag og daghang kasayuran si Bastes sa mga reporters aron dili madaot ang nagpadayon nila nga imbestigasyon. Daku g’yud ang pagduda ni Alqueza nga dunay kalabotan ang pagpasaka niya og kaso sa ilang barangay treasurer sa pagbanhig kanila ni Konsehal Wamilda.

Hinoon giklaro ni Bastes nga wala pa nila giisip nga suspek ang maong tresurera tungod kay walay ebidensya sa iyang kalambigitan sa maong kaso. Miingon si Bastes nga nahinabi na niya ang maong tresurera ug gihulat na lang niini nga hatagan siya’g sulat sa Ombudsman aron iya kining matubag ang pasangil ni Alqueza.

Gipasakaan og kaso ni Alqueza ang barangay treasurer kay wala kini makahatag og kwentada sa P2.7 milyones nga pundo sa barangay. Si Bastes miingon nga dili pa sila makapasaka og kaso kay wala pa man sab mahuman ang ilang imbestigasyon.

Gibanhigan si Alqueza ug si Wamilda luwan sa usa ka multicab padulong na unta sila nga mobalik sa Barangay Capitan Claudio gikan nga nagpasaka og kaso sa barangay treasurer didto sa Ombudsman. - /RUB (BANAT NEWS)