Luna sa San Miguel sa Barangay Apas di iya sa Kapitolyo

CEBU, Philippines - Miangkon kagahapon si Gob. Hilario Davide III nga ang kontrobersyal nga luna sa sitio San Miguel, Barangay Apas, Cebu City dili iya sa probinsya.

“Initially nahibaw-an nato nga di yuta sa probinsya kana karong kontrobersyal,” matud pa ni Davide.

Apan ang gobernador mipasalig nga tun-an sa Kapitolyo kung unsay sunod niining lakang aron matabangan ang 157 ka pamilya nga nagpuyo sa maong luna  nga gitagalan na lang kutob sa Marso 4, ang adlaw sa demolisyon.

Si Municipal Trial Court in Cities Branch 6 Judge Pamela Baring-Uy miluwat og writ of demolition batok sa mga panimalay nga gitukod sa Lot. No 942 ug 947 sa sitio San Miguel,  nga gipanag-iya ni Aletha Suico-Magat.

 Ang mga molupyo misupak sa mando sa korte ug miinsister nga ang probinsya ang nanag-iya sa maong kayutaan.

 Si Paulino Entera sa Provincial General Services Office, sa iyang bahin, nagkanayon nga misuwat na sila sa Mactan-Cebu International Airport Authority (MCIAA) naghangyo nga ibalik na ang mga yuta sa probinsya nga naa sa barangay Lahug nga wala na gigamit isip airport.  Dihang gibalhin ang airport sa dakbayan sa Lapu-Lapu, ang kanhing airport sa Lahug gihimo na og usa ka commercial district nga gitawag karon og IT Park.  Ang Lot. No. 942 ug 947 himuon unta nga extension sa airport, apan wala kini madayon kaniadto apan matud pa ni Entera base sa Executive Order No. 20 nga giluwatan ni Gobernador General Francis Burton Harrison niadtong 1902, gitugotan ang probinsya sa paggamit sa maong mga luna uban sa daghan pang gitawag nga Friar Lands.

Apan matud pa ni Davide, kadaghanan sa yuta sa siyudad sakop sa Friar Lands kaniadto.

“Posible sa milabay’ng mga tuig natituluhan ang uban niini sa mga pribadong indibidwal,” matud pa ni Davide.

Si Davide  mipasalig hinuon nga pangitaan nila og paagi kun unsaon pagtabang ang mga molupyo sa Lot. No. 942 ug 947.

Ang nahisgutang mga residente moduso og petisyon alang sa Temporary Restraining Order (TRO) ngadto sa Regional Trial Court (RTC) aron di madayon ang demolisyon karong Marso 4.            

“Mosumite mi og petisyon aron mapugngan ang order nga demolisyon sa korte,” matud ni Apas barangay captain Ramil Ayuman.

Kagahapon ang Local Housing Board, Division for the Welfare of the Urban Poor (DWUP) ug si Ayuman nakadesider nga mohangyo ngadto sa konseho nga mopahigayon og imbestigasyon kalabot sa demolition order.   (BANAT NEWS)