Suroy-Suroy sa Sugbu gigahinan og mas daku nga pundo nga P5M

CEBU, Philippines - Bisan sa hangyo sa Commission on Audit nga minusan ang gasto sa Suroy-Suroy Sugbo, ang Kapitolyo nigahin og mas dako nga pundo balor og P5 milyones alang sa tuig 2014 itandi sa 2013 nga P3 milyones.

Laing gigahin nga P2.2 milyones ubos gihapon sa buhatan sa gobernador alang sa ubang kalihukan may kalabutan sa turismo sa lalawigan sa Sugbo nga kabahin sa napasar nga 2014 budget. Ang Suroy-Suroy Sugbo gisugdan niadtong 2005 sa Balik Cebu Group isip kabahin sa kalihukan sa Cebu Chamber of Commerce and Industry’s Cebu Business Month ug gisagop  isip programa sa lalawigan sa Sugbo.

Gani usa ka ordinansa nga gipangamahan ni Bokal Arleigh Jay Sitoy ang gipasar aron magpadayon ang maong programa.

Sayo niini ang COA mirekomendar nga minusan ang gasto bisan ilang nakita nga maayo ang programa tumong sa pagpalambo sa turismo sa Sugbo.

Si Bise Gob. Agnes Magpale kinsa maoy tsirman sa komitiba sa turismo sa hunta probinsiyal nipahibawo nga gihimo na nila ang kausaban subay sa hangyo sa COA.

Sa dihang nahimong kasamtangang gobernador si Magpale human sa pagkasuspenso ni kanhi gobernador Gwendolyn Garcia, iyang gitubag ang COA sa nakita niining depekto sa gasto sa Suroy-Suroy nga niabot og kapin sa P11 milyones sa tuig 2012.

Gipasabot ni Magpale nga  dili aron pagtigom og kwarta ang tumong sa programa kundili pagpalambo sa turismo ug pagpakita sa mga talan-awon sa kalungsuran.

Sa panahon ni Garcia, dili mominus upat ka hugna ang pagpahigayon sa Suroy-Suroy apan gihimo na lang kini ni Magpale nga duha.

Sa 2012, ang Kapitolyo nigahin og P10.7 miyones alang sa Suroy-Suroy Sugbo ug gihimo kining P7.6 milyones ni Garcia sa 2013.

Apan human siya nasuspenso, ang gahin sa 2013 gilaslasan ni Magpale ug kaubanan sa hunta probinsiyal ngadto na lang sa P3 milyones. (/EIM)(BANAT NEWS)