DSWD nagtukod og one-stop-shop
CEBU, Philippines - Nakig-alayon ang Department of Social Welfare and Development (DSWD-7) sa ubang ahensya sa gobyerno alang sa pagpatukod og one-stop processing station nga modawat sa tanang foreign donations didto sa Mactan Airbase. Matud pa ni Kerwin Macopia, usa sa mga tigpamaba sa DSWD-7 nga kini agi og tubag sa awhag ni Commissioner Ruffy Biazon sa Bureau of Customs (BOC) alang sa pagbaton og usa ka lugar diin adto ipahimutang ang tanang mga hinabang.
Sa samang higayon gitumong usab kini aron katabangan ang BOC sa pagpagawas niining maong mga hinabang sulod sa 24 ka oras ngadto sa mga hingtungdan. Dugang pa ni Macopia nga kining maong one-stop-station bukas sulod sa 24/7 o matag adlaw sulod sa usa ka semana.
Hinuon giklaro sa DSWD-7 nga dili tanang mga donasyon ang anaa sa ilang kustodiya.
Sumala ni DSWD-7 Regional Director Mercedita Jabagat may kaugalingong desisyon ang mga donor kun asa nila itunol ang ilang mga hinabang.
Gipadayag ni Jabagat nga adunay ubang international nga organisasyon nga mipili sa paghatag sa ilang mga hinabang ngadto sa lokal nga kagamhanan nga kaalayon usab niini.
Gipasabot ni Jabagat nga base sa revised omnibus guidelines sa pagproseso og mga donasyon ilabi na sa gikan sa gawas, ang Social Welfare and Development Agencies (SWDA) maoy gitugotan sa pagsumiter og authenticated deed of donation gikan sa Philippine Consular Office sa nasud. Sumala pa ni Jabagat nga gikinahanglang mosumiter usab sila og shipping documents nga original ug certified true copy sa Bill of Loading ug Airway Bill ug usab Packing List. Gitug-an ni Jabagat nga sa milabay’ng semana ang People's Republic of China mihatag og 2,600 ka pakete nga mga tolda ug habol.
“The Chinese Government has been following closely the situation in the typhoon-hit areas,†kini matud pa ni Economic & Commercial Counsellor Wu Zhengping. Gipaniguro ni Jabagat nga ang tanang mga donasyon ayuhon gayud nila sa pag-account uban sa acknowledgement receipt niini. (BANAT NEWS)
- Latest
