Kaso sa dengue mikupos

CEBU, Philippines - Miubos og 11.2 porsiyento ang gidaghanon sa kaso sa dengue dinhi sa Central Visayas  itandi sa susamang  periodo sa miaging tuig.

Base sa ulahing tala sa Department of Health Regional Office (DOH)-7  nasuta  nga sukad niadtong  Enero hangtud sa Nobiyembre ning tuiga mikabat lang  sa 14,660 ka mga kaso sa dengue  nga  may 53 niini ang nangamatay.

Ang DOH-7 miingon nga ang maong gidaghanon mas ubos pa kay sa niaging tuig sa susamang bulan nga mitala og 16,519 ka kaso  ug 55 niini ang namatay.

Nasayran nga kasagaran sa nataptan sa dengue mao ang nagpangidaron og 2 anyos hangtud sa 10 anyos nga bata.

Ang dakbayan sa Sugbo mao gihapon ang adunay labing taas nga gidaghanon  sa mga   kaso sa dengue nga mikabat  sa 3,664 ka kaso ug upat niini ang namatay.

Gisundan kini sa dakbayan sa Dumaguete, Lapu-lapu, Carcar ug Talisay .

Mipahimangno pag-usab ang DOH-7 sa katawhan nga dili mokompyansa ug manglimpyo gyud sa ilang palibot.

Ilabi  na  karong  panahona  nga mokalit  lang og  bunok ang uwan nga mahimong hinungdan   sa pagkapundo  sa  mga lamok sa suok.

Hinuon mapasalamaton ang DOH-7 sa pagkibra  sa kaso sa dengue sa Central Visayas. (BANAT NEWS)