Katabang gituok sa nanguyab

CEBU, Philippines - Patay nang napalgan kagahapon sa buntag diha sulod sa banyo sa balay sa iyang amo sa BF Homes Subdivision, barangay Lawaan I, dakbayan sa Talisay ang usa ka katabang kinsa gidudahang gituok.

Ang biktima mao si Mary Jane Apaap Parame, 22-anyos, lumad nga taga barangay Camp 8, dakbayan sa Toledo ug katabang ni Teresita Gabisan.

Ang suspetsado kinsa padayon pang gipangita sa kapolisan gituohan nga mao si Edsel Deiparine, taga barangay Veto, lungsod sa Minglanilla.

Sila si Inspector Rogene Fodutan, SPO1 Edgar Causon, SPO1 Isaias Cabuenas ug SPO1 Benjamin Sebellita daling miresponde sa maong dapit ug ilang nasayran nga si Deiparine nakapuyo kaniadto sa balay nila ni Gabisan isip katabang sa beauty parlor sa anak sa ginang.

 Niining ulahi giingong nahibaw-an nga nanguyab si Deiparine kang Parame ug kagahapon sa kaadlawon gikatahong nakit-an kini nga nanuktok sa pultahan sa balay ni Gabisan.

Kagahapon sa buntag, gisangpit ni Gabisan si Parame apan wala kini motubag maong gipangita kini niini ug didto sa banyo nahibulong siya nga dili maabli ang pultahan nga daw dunay nagpugong niini gikan sa sud.

Dihang gibuhian ni Gabisan ang door knob kalit nga migawas ang usa ka lalaki nga kaparehas og pamayhon ni Deiparine nga nagtabon og tualya sa nawong ug ulo ug kalit nga midasmag kaniya hinungdan sa iyang pagkatumba.

Matud pa ni Causon nga sa pagsusi ni Gabisan sa banyo iyang nakita ang katabang nga nag-panty ug bra na lang apan wala nay panimuot hinungdan nga dali kining nangayo og panabang.

Gidudahang gituok ang biktima tungod kay adunay nakitang lagom sa liog ug dunay nigawas nga dugo sa baba ug ilong sa dalaga.

Samtang ang tualya nga gigamit sa suspetsado og tabon sa iyang nawong nakit-an diha sa gawas sa balay.

Gawas niini ang mga polis naka-recover diha sa banyo sa may tiilan sa biktima og usa ka Boardwalk wrist watch nga gituohang iyaha sa suspetsado.

Ang patay’ng lawas ni Parame gidala ngadto sa Mount Olive Funeral Homes aron mapaubos sa autopsy pagpiho kung nalugos ba ang biktima. (BANAT NEWS)