Inside job gitutukan paglungkab sa bangko
CEBU, Philippines - Inside job ang gitutukang anggulo sa kapolisan sa pagpanglungkab sa usa ka bangko sa Dawis Norte sa lungsod sa Carmen sa miaging adlaw.
Si Chief Inspector Alvin Balio ang hepe sa Carmen Police Station nga nahinabi sa Banat News miingon nga wala siya’y nakitang “force entry†sa Bangko de Katipunan nga usa usab ka lending firm.
Sumala pa ni Insp. Balio nga siya gayud mismo ang nangunay sa pag-conduct sa ocular inspection sa lugar pasado alas 9:00 sa buntag human niya madawat ang maong taho. Miagi ang wala pa mailhing mga tawo sa roll-up main door sa maong bangko pinaagi sa pagguba sa padlock niini.
Matud pa nga giguba usab ang vault ug gisakiyo ang P300 mil nga kwarta lakip na ang kalibre .38 nga revolver nga service firearm sa gwardiya nga si Ryan Reyes Riveral.
Matud pa ni Balio nga lima lamang ang empleyado sa maong bangko ug ika-unom ang security guard niini, nasuta nga base sa paagi sa pagsulod sa kawatan, suhito kini sa maong establisamento.
Dugang ni Insp. Balio nga iya nang nahinabi ang area manager sa maong bangko ug iya kining nasultihan nga posibleng inside job ang maong hitabo.
Iya sab kini nga gitug-anan nga dunay lapso sa management sa maong bangko sa iyang seguridad maong nahitabo ang maong pagpanglungkab.
Matud pa nga nakadawat og taho ang kapolisan sa lungsod sa Carmen pinaagi sa branch manager sa maong establisamento nga gilungkab ang ilang sangang buhatan sa maong dapit. (/EIM)(BANAT NEWS)
- Latest
