23 mil ang namakwit sa Lapulapu gumikan sa bagyo

CEBU, Philippines - Mikabat  sa 23,700 ka mga   bakwit  ug 7 ka dalan sa dakbayan sa Lapulapu ang dili maagian og sakyanan tungod sa mga nabaling kahoy mugna sa bagyong Yolanda kagahapon.

Base sa talaan sa City Disaster Risk Reduction Management Council (CDRRMC) sa dakbayan sa Lapulapu nasuta nga gawas sa mga namakwit sa mga tunghaan  adunay mga residente nga daling namakwit sa NAVFORCEN gym, Fire Department central office, simbahan, Shangrila hotel ug sa city hall mismo sa dakbayan sa Lapulapu. Matud pa ni Teodolo Ybanez ang City Administrator ug CDRRMC Co-Chairman,  nga  base sa report ni Ermilita Degamo ang  hepe  sa DSWD   nga  mikabat na  sa 23,700 ka  molupyo sa dakbayan sa Lapulapu ang midangop sa mga evacuation centers ug gihatagan og igong pagkaon ug kagamitan sa mga sakop sa DSWD.

Ang Philippine Red Cross miresponde sa usa ka Enrico Abellion sa Sitio Sea Breeze Brgy. Ibo dakbayan sa Lapulapu nga natagak sa punoan sa kahoy atol sa paghapak sa bagyo samtang namutol kini sa kahoy duol sa iyang   balay.

Samtang si Alejandro Garcia, 62 ,minyo, ug residente sa Brgy. Buaya   nadala  usab  sa tambalanan  human  atakeha  sa sakit  sa kasingkasing,

Dali kining natabang sa mga sakop sa Red Cross sulod sa evacuation center sa Buaya elementary school. Sirado usab ang mga dalan sa Brgy. Looc, Humayhumay, Marigondon, Turil sa Brgy. Canjulao, Bagong Bayan sa Brgy. Maribago, Ceres road ug Brgy. Subabasbas human matumba ang mga kahoy daplin sa dalan  gumikan  sa bagyo. Sa isla sa Olango gibanabanang 25 ka  balay ang naguba base sa  namonitor sa CDRRMC samtang padayon pa ang pagsuhid sa mga dapit nga wala pa masusi sa mga otoridad ilabi na sa mga gagmay  nga  isla sama  sa Pangan-an, Tingo, Caw-oy ug Cauhagan.

Hinuon mapasalamaton si Ybanez nga walay gikatahong nakalas sa maong trahedya ug matuman ang tinguha ni Mayor Paz Radaza nga zero casualty pinaagi sa ilang pagpangandam sa pag-abot sa bagyong Yolanda. (/WC) (BANAT NEWS)