Mobile crane natagak 2 patay

CEBU, Philippines - Duha ka mga tawo ang nakalas human matagak ang mobile crane nga ilang gisakyan sa barangay Uling sa dakbayan sa Naga alas-12 sa tungang gabii sa miaging adlaw.

Ang mga nakalas naila nga sila si Arquilao Villacen, 42, molupyo sa Puting-Bato sa dakbayan sa Navotas.

Samtang pabilin pang wala mailhi ang drayber sa maong mobile crane hangtod sa pagsulat ning balita.

Si PO1 Darwin Melodia nga nahinabi sa Banat News miingon nga dunay mitawag sa buhatan sa Naga City Police Station nga nagpahibawo nga dunay nadisgrasya sa barangay Uling. Sa ilang pagresponde sa lugar ilang nakita ang maong mobile crane sa ubos nga bahin sa dalan. Matud pa ni Melodia nga base sa imbestigasyon nasuta nga nakaangkon og mechanical problem ang maong mobile crane hinungdan sa pagkatagak niini.

Miingon si Melodia nga daling gidala si Villacen sa Minglanilla District Hospital apan gideklarar kini nga dead on arrival ni Dr. Anton Rebosar.

Matud pa ni PO1 Melodia naugkat ang patay nga lawas sa wala pa mailhing drayber pasado alas 3:00 kagahapon sa hapon. (Bryner Diaz/EIM)

Babayeng ‘police asset’ gipusil patay sud sa internetan

Patay ang usa ka 37- anyos nga babaye nga gidudahang police informant dihang gipusil samtang nag-chat sa usa ka internet café diha sa barangay Pajo, dakbayan sa Lapulapu ala-una pasado ang takna sa kaadlawon kagahapon.

Si PO3 Luisito Pinos sa Homicide Section sa kapolisan sa maong dakbayan miila sa biktima nga mao si Shaina Tamama, 30, nagpuyo sa sitio Paradise sa barangay Pajo sa maong dakbayan.

Matud pa ni Pinos usa ka wala mailhing lalaki nga nagsuot og jacket nga gray ug nagsul-ob usab og closed- type helmet nga gibanabana nga 5’4” height  ang mipusil sa biktima tulo ka higayon.

Ang 17-anyos nga internet attendant miasoy sa kapolisan nga misulod ang wala mailhing lalaki nga wala magtangtang sa gisuot niining helmet ug midiretso sa cubicle 15 diin nag-internet ang biktima ug kalit kining gipusil sa makatulo ka higayon.

Daling migawas ang gunman ug misakay sa motorsiklo nga gimaneho sa laing kauban diha sa gawas ug miikyas palayo.

Patay na kini pag-abot sa Lapulapu City Hospital apan gideklarar kini sa mga doktor sa maong tambalanan nga dead on arrival. Tulo ka basiyo sa kalibre 45 nga bala ang nakuha sa crime scene.

Matud pa ni Pinos  nga base sa pakisusi nga ilang gihimo nagpa- blotter sa Presinto 5 sa Lapulapu City Police Office tungod kay nakadawat kini og hulga sa iyang kinabuhi gikan sa mga drug pushers nga nagduda kaniyang siya maoy tigsumbong sa kapolisan. (/EIM) (BANAT NEWS)