Duterte mitunol og hinabang sa Bohol ug Cebu
CEBU, Philippines - Davao City Mayor Rodrigo Duterte mitunol og hinabang nga P5 milyones sa lalawigan sa Sugbo nga personal niyang gitunol kang Cebu Gov. Hilario Davide III kagahapon sumala pa sa report sa DyRC Radyo Calungsod.
Unom usab ka mga lungsod ug tulo ka component cities sa lalawigan ang nalakip sa maong hinabang nga personal nga gidawat sa ilang mga mayor.
Si Duterte mibisita sa buhatan ni Davide kagahapon aron pagtunol sa maong hinabang. Ang kada lungsod ug siyudad makadawat og tag-tunga sa milyon ka pesos aron ilang gamiton tungod sa pag-igo sa linog.
Ang mga nahatagan mao ang lungsod sa Sibonga, Argao, Minglanilla, Dumanjug, Tabogon ug Boljoon, ang dakbayan sa Mandaue, Talisay ug Toledo nakadawat sab sa maong hinabang.
Ang mayor lang sa dakbayan sa Toledo nga si Mayor John Henry “Sonny†Osmeña maoy wala nakatambong. Gawas sa Cebu, mitunol usab og hinabang nga P13.5 milyones didto sa Bohol si Duterte.
Matud ni Duterte ang maong tabang niya sa lalawigan sa Sugbo ug Bohol agi og pag-uli sa natabang usab sa duha ka lalawigan sa ilang dakbayan dihang gibombahan ang ilang airport niadtong tuig 2003.
Ang lalawigan sa Sugbo nakahatag na og hinabang sa Bohol sama sa pagkaon ug tubig apan sabutan pa ni Davide ug ni Vice Governor Agnes Magpale kauban ang mga provincial board members kung pila ang ihatag nila nga financial assistance sa maong lalawigan. (BANAT NEWS)
- Latest
