Giluba angol sa gruposa mga batan-on

CEBU, Philippines - Nabuslot ang tiyan sa usa ka tawo nga gidunggab sa grupo sa batan-ong mga lalaki   didto  sa Plaza Rizal, barangay Poblacion, dakbayan sa Lapulapu  sa miaging kaadlawon.

Ang biktima mao si Ramon Asis, hingkod, ulitawo nga taga barangay Ibo sa maong dakbayan ug   usa  sa  mga  suspetsado nga  miluba  kaniya  nailhan  lang  sa angga  nga  Gato.

Si Senior Inspector Zenaido Pastorfide Jr., hepe sa homicide section sa kapolisan sa maong dakbayan nga nahinabi sa Banat News miingon nga naglingkod-lingkod lang ang biktima sa maong dapit dihang giduol kini sa kauban sa grupo sa mga batan-ong lalaki nga nailhan lang sa ngalan nga Elmer.

Dugang pa ni Senior Inspector Pastorfide nga si Elmer nakighigala  sa biktima unya  si   Gato miabot  usab  ug  didto  milipot  sa likod sa biktima.

Ang biktima nga nakamatngon  nga  lipotan  siya,  dali nga miatubang kang Gato apan gisugat   siya   sa kutsilyo  nga  giduslak  sa  iyang  tiyan .

Matud pa ni Senior Inspector Pastorfide nga human  dunggaba gikuha  dayon  sa  mga  kauban  sa suspek  ang cell  phone sa  biktima ug  dayon  nanglayas  nga gibiyaan  ang  nag-inusarang  biktima  nga  nagligid  na  sa yuta.

Si Pastorfide miingon nga ikaduha na kini nga panghitabo sa pagpanunggab sa maong dapit,

Unang nadunggaban  sa  maong  lugar  mao  si   Junrey Abenuja nga taga barangay Basak sa maong dakbayan.

Gihatud dayon  sa tambalanan  ang  biktima  samtang  gipangita  usab  dayon  sa kapolisan  ang suspek  ug  ang  mga  kauban  niini. (BANAT NEWS)