Amahan ug anak mitubag sa sugo sa lawas gipamusil angol

CEBU, Philippines - Nalandig sa tambalanan ang usa ka amahan ug ang iyang dalagita nga anak human sila pusila sa wala hiilhing tawo samtang mitubag  sa sugo  sa lawas didto sa libon sa  likud  sa ilang  balay  sa sitio San Miguel, barangay Poblacion sa lungsod sa Asturias sa alas 7:00 sa miaging gabii.

Ang  mga biktima naila nga si Anecito  Mahinay Trazo, 37, ug ang iyang anak nga si Roche Capangpangan Maones, 13, pulos  lumolupyo sa maong sitio.

Matud ni SPO3 Denis Nocos sa kapolisan  sa Asturias Police  Station  nga nahinabi sa Banat News nga hangtod karon dili pa nila matino kun kinsa ang nagpusil ug sa motibo sa maong  pagpamusil sa amahan ug anak.

Miingon si SPO3 Nocos nga didto  sa libon  sa likud  sa ilang  balay  ang mga  biktima  nga  mitubag  sa  sugo  sa lawas   dihang gipamusil sila ug wala makakita  sa kriminal.

Ang  amahan nakaangkon og samad sa iyang walang tiyan samtang naigo usab ang tuong abaga  sa iyang anak.

Matud pa nga nakadungog og pipila ka buto si Trazo sa wala pa matino nga armas apan wala niya kini panumbalinga.

Nakabantay na lang siya  nga samdan  siya ug ang iyang anak busa dali silang midagan ngadto sa hayag nga dapit ug nangayo og panabang  sa  ilang mga silingan. Gidala ang duha sa Balamban Provincial Hospital apan gibalhin ra usab dayon sa usa ka tambalanan sa dakbayan sa Sugbo. 

Samtang padayon pa ang imbistigasyon sa kapolisan sa  pag-ila sa mipusil sa duha ug  sa pagtino  sa hinungdan  niini. (BANAT NEWS)