Delivery truck natagak sa bung-aw usa patay

CEBU, Philippines - Usa ang patay ug laing usa ang angol human mahulog ang usa ka delivery dump truck sa 50- metros nga bung-aw kagahapon sa buntag sa Barangay Hagdan lungsod sa Oslob.

Duha ka oras pa ang milabay una pa nakuha ang lawas sa  drayber niini nga si Joel Belado, 29,  taga Barangay Obong, Dalaguete. Matud pa nga naipit sa driver’s seat si Belado nga maoy nakaingon sa grabeng kadaot nga nahiaguman sa iyang lawas ug ulo, patay na kini pagsusi ni Municipal Health Officer Dr. Christopher Amit. Samtang naangol ang ig-agaw niini nga si Hope Belado, 14,  kinsa swerteng nakalayat sa trak sa dayon nang katugpa sa maong sakyanan sa ubos sa bung-aw, ang bata gidala sa Oslob District Hospital. Samtang ang laing kauban sa mga nangaangol nga si Gerald Muñoz una nang milayat gikan sa trak sa wala pa kini hingpit mahulog sa pangpang ug nakaangkon lang og ginagmay’ng pangos.

Ang tulo matud pa nga sakay sa Isuzu Elf dump truck (YCR 363) paingon sa lungsod sa Samboan karga ang nagkadaiyang construction materials gikan sa lungsod sa Dalaguete.

Si SPO1 Job Sarvida, desk officer sa maong police station mibutyag sa Banat News nga kurbadahung dalan ang gisubay sa mga biktima apan mibuto ang atubangang ligid niini hinungdan nga nawagtangan og kontrol ang drayber ug milahos sa pangpang. “Wala siya makagawas kay ga-seatbelt man nagkulob na siya unya murag nilapos iyang lawas sa windshield,” matud ni Sarvida. (BANAT NEWS)