Spokesman sa PDEA gipatay

CEBU, Philippines - Kanhi reporter ug Public Information Officer sa Philippine Drug Enforcement Agency -7 nga gibalhin na didto sa CARAGA Region gipusil patay sa wala pa milhing lalaki sa dalan Escario, barangay Kamputhaw sa dakbayan sa Sugbo sa 11:45 sa miaging gabii.

Ang biktima naila nga si Jesus Rabusa Tabanao, 35- anyos, lumulupyo sa Camella Homes sa barangay Lawaan sa dakbayan sa Talisay ug kasamtangang Public Information Officer sa PDEA sa Caraga Region.

Base sa pasiunang imbistigasyon sa Homicide Section inubanan sa Scene of the Crime Operation 7 nga may gikuha sa luyo sa iyang pick-up si Tabanao dihang miabot ang usa ka gunman nga nag-motor.

Matud pa nga ang mamumuno mikanaog sa iyang motorsiklo nga gi-parking sa atbang diin nagbarog si Tabanao, kalma ra kaayo nga milabang ug mipusil niini sa iyang likod sa makapila ka higayon.

Daling misibat ang suspetsado sakay sa iyang motorsiklo padulong sa direksyon sa amihanan samtang si Tabanao nahagba na sa yuta nga walay kinabuhi.

Nakaangkon si Tabanao daghang samad pinusilan sa iyang buko-buko nga milapos sa atubangang bahin sa lawas niini.

Napalgan sa kapolisan ang walo ka kabhang nga bala sa .9mm, duha ka .9mm nga pistol ug tulo ka cellphone diha sa crime scene.

Gideklarar nga patay si Tabanao sa mga sakop sa Emergency Rescue Unit Foundation pinangulohan ni Jed Esapina nga mirespondi sa lugar.

Si PO1 Michael Singson sa Homicide Section nga nahinabi sa Banat News miingon nga dunay gipatawag nga case conference ang kadagkoan sa Cebu City Police Office aron subayon ang motibo sa pagpamusil.

Susihon pa sa mga imbestigador ang report nga  may usa ka gialarmang armado nga tawo sa may JY Square Mall sa Lahug sa wala pa mahitabo ang maong insidente.

Samtang ila usab nga sutaon kun tinuoray ba nga nakit-an ang biktima nga diha sa Fuente Osmeña human mamalit og tambal.

Ang hepe sa PDEA sa rehiyon nga nahinabi sa Banat News nga si Lyndon Aspacio mikondenar sa pagpusil patay kang Tabanao.

“We condemn the gruesome killing og Jess Tabanao, this is an unfortunate event,” matud pa ni Aspacio.

Gibutyag ni Aspacio nga gihatagan nila og gibug-aton ang kasigurohan sa ilang mga ahente sa PDEA ug gusto nilang mahibaw-an kung asa ang ilang mga ahente.

Nasubo si Aspacio sa maong hitabo ug miduyog siya sa kasub-anan sa pamilya ni Tabanao apan iyang gitin-aw nga bisan pa man sa pagpamusil sa ilang ahente padayon nilang buhaton ang ilang mandato.

Si Jess Tabanao matud pa ni Aspacio mga duha na ka semana nga nabalhin sa Caraga Region ug niuli lang dinhi sa Sugbo apan gipusil patay man hinoon kini sa wala mailhing tawo.

Hangtud karon ang asawa ni Jessie Tabanao dili kini makatuo sa gidangatan sa iyang bana.

Si Katrina Tabanao, asawa sa namatay nga ahente sa PDEA nagkanayon nga dili pa siya makatuo sa gidangatan sa iyang bana.

Sa wala pa mahitabo ang pagpamusil, si Katrina diha kini sa IT Park uban sa mga higala ug naghuwat kini nga kuhaon ni Jessie.

Gibutyag ni Katrina nga nagtext-text pa sila sa iyang bana apan pila ka minuto nila og textsanay wala na kini motubag hinungdan miusab siya sa pag-text nga adto na lang sila magkita sa buhatan sa PDEA ug wala gihapon kini motubag.

  Nahibaw-an na lang niya nga gipusil patay ang iyang bana sa gi-post sa Facebook.

Gibutyag ni Katrina nga niadtong Septiyembre 1, 2013 ang iyang bana nadestino na kini ngadto sa PDEA sa probinsiya sa Butuan ug niuli kini niadtong Biyernes ug karong adlawa (Lunes) gikatakda unta kining mobalik na usab ngadto sa Butuan.Walay nahisgutan ngadto kaniya ang iyang bana kung duna bay nasuko niini o duna bay mibahad sa kinabuhi niini.  (BANAT NEWS)