Bigtime ‘drug pusher’ na-buybust
CEBU, Philippines - Naka-iskor na usab ang mga sakop sa City Intelligence Branch human nasikop ang usa ka gihulagway nga big time pusher atol sa buybust operation pasado alas- 8 sa miaging gabii diha sa dalan President Roxas sa barangay Mabolo ning dakbayan.
Ang nasikop mao si Mark Clint Mabaga alyas Barkley, molupyo sa sitio Lawis, Barangay Lorega ning dakbayan.
Ang buhatan sa CIB nakadawat og impormasyon kalabot sa pagpamaligya ni Mabaga og illegal nga drugas.
Usa ka buybust operation ang gilusad sa kapolisan ug giingong napalitan kini og usa ka bultong shabu sud sa giabangan niining apartment sumala pa ni CIB Chief Insp. Romeo Santander nga gikahinabi sa Banat News.
Matud pa ni Santander base sa ilang impormasyon dinagko ang negosyo ni Mabaga kay dili moubos sa 25 gramos ang ibaligya niini.
Gipadayag usab ni Santander nga posibling ang gituohang shabu nga mikatap sa Sugbo adunay posibilidad nga naggikan kini sa Banacon Island sa Getafe Bohol diin magtago ang giingong druglord nga si Rowen Secretaria alyas Yawa kinsa nakaipsot sa drug raid sa kapolisan sa milabay’ng gabii. (BANAT NEWS)
- Latest
