Misunog sa balay napusilan

CEBU, Philippines - Naangol ang usa ka 49-anyos nga lalaki nga giingong nisuway og sunog sa ilang pinuy-anan human kini napusilan sa nirespondeng mga polis tungod sa pagsuway niini og atsa sa mga tinugyanan sa balaod niadtong Lunes sa udto diha sa barangay Dagatan sa lungsod sa Badian.

Ang suspek nga naangol mao si Leonardo Anticristo Torreno, 49 anyos, minyo nagpuyo sa maong lugar giingong dunay deperensiya sa panghunahuna.

Matud ni PO1 Apollo Conception sa Badian Police Station dihang nahinabi sa Banat News subay sa inisyal nga imbestigasyon gisul-an ang suspek ug nag-wild hinungdan nga nanggawas ang iyang asawa nga si Esmeralda Torreno, 47, ug mga anak. Sumala pa nga gisunog niini ang ilang sawog nga kawayan dihang naabtan sa mga polis pinangulohan ni Insp. Edgar Labe kinsa mikombinsir sa suspek nga mogawas tungod kay nagkadako na ang kalayo sa balay.

Apan inay nga mogawas wala kini mopatuo hinungdan nga gibukbok sa mga polis og bato ang bungbong sa balay. Apan gikasuko hinuon kini sa suspek kinsa migawas nga nagbitbit na og atsa ug gi-atsa si Insp. Lape ug swerteng nakalihay. Sunod nga gigukod sa suspek si PO3 Redimir Abendan apan sa paghunat niya og bugha sa polis naunhan niya kini pagpusil sa tuong paa hinungdan nga nabuhian sa suspek ang hinagiban.

Diha-diha gitabangan og layog sa mga polis si Torreno ug gihatud sa Badian District Hospital apan gi-transfer sa Vicente Sotto Memorial Medical Center ug gibantayan na og polis.

Hinoon wala mahurot og kasunog ang pinuy-anan niini human daling nakarespondi ang mga sakop sa kabomberohan ug napawong ang kalayo. (BANAT NEWS)