2 ka eksamin giandam sa CSC ning tuiga

CEBU, Philippines - Duha  ka  eksamin  ang  ipatuman  sa Civil  Service Commission (CSC)  niining tuiga  isip  usa sa kwalipikasyon  sa  buot  manarbaho  sa mga  buhatan sa gobiyerno.

Si Ma.   Carred  Lam  sa CSC7  mibutyag  sa  Banat News  nga  ang  maong  mga  eksamin  mao  ang  alang  sa Stenographer  ug  sa  Professional  ug  Non-Professional  Examination.

Matud pa  ni Lam  nga  ang  stenographer  examination  ipahigayon  unya sa  Nobiyembre 13, 2013  ug  ang  deadline  sa pagpanawat  sa CSC  sa  mga  application  mao  ang  Oktubre 25.

Samtang  ang  professional  ug  non-professional  examination,  ipahigayon  sa Oktubre 13,  ug  ang deadline  sa pagpanawat  sa  CSC  sa application  mao  ang  Agosto 30, 2013.

Gisaysay  ni  Lam  nga  ang  mga  gikinahanglan  nga  mga  papeles  mao  ang  transcript of records,   upat  ka  hulagway  nga  may name tag  sa ubos  sa suwang,   birth  certificate  nga  giluwat  sa National  Statistics Office (NSO) ug  bayad  nga  P500.

Aron sa  pagsiguro  nga  makahibawo  ang  kadaghanan,  ang  mga  kawani  sa CSC  mosuroy  sa nagkalainlaing  lugar  sa lalawigan  alang  sa  pagdawat  sa on  site applicants.

Sa Agosto 20, 2013  moadto  sila  sa University of San Carlos sa  dalan  P. del Rosario, Cebu City  sa buntag,  ug  sa hapon  tua  usab  sila  sa University  of San Jose  Recoletos (USJR).

Sa  Agosto 23 moadto  sila  sa city hall  sa Danao  City  sa buntag,  ug  sa hapon  usab sa maong  adlaw  tua  sila  city hall  sa  City of Bogo.

Sa Agosto 28 -30 adto sila  moestar  sa  Robinson Fuente, sa dakbayan  sa Sugbo.

Kini  sa tuyo  nga  dili  maglisud  sa pag-file  sa  ilang  mga  aplikasyon  ang  mga  aplikante  sa duha  ka  eksamin  sa tibuok  lalawigan.

Samtang  ang  mga  buhatan  sa CSC  sa  rehiyon  nga  tua  sa barangay  Lahug,  ug  ang  provincial  office  nga  tua  sa Capitol,  bukas  sa tanang  adlaw  nga  ting-opisina  sa   pagdawat  sa  mga  application  sa  mga  aplikante, matud  ni  Lam.  (BANAT NEWS)