Junk shop sa Labangon pasirhan

CEBU, Philippines - Sangko sa langit ang kalagot sa mga opisyal sa Barangay Labangon nianang junk  shop nga nag-operate sa aseras sa ilang barangay kay matud pa nakapadaghan  sa mga kawat.

Gusto ni Labangon Barangay Captain Victor Buendia nga bungkagon dayon sa mga sakop sa City Hall Clearing Team ang mao nga Abay-abay Junk shop nga nahimutang sa Happy Valley.

Makadaghan na nga si Buendia ug kaubanang opisyal sa Labangon mipadala og suwat sa City Hall aron aksyonan kini nga reklamo apan wala pa gayud mahatagi og pagtagad.

Matud ni Buendia nga tungod sa mao nga junk shop daghang mga batan-on ang magsuroy-suroy sa ilang barangay kay kunohay mangita’g mga butang nga ilang ikapatimbang apan modalikyat ‘sab og pagpangawat.

 Kining maong isyu gituki sa Cebu City Council sa ilang sesyon kaniadtong miaging semana ug giduso ngadto sa opisina ni Raquel Arce, ang hepe sa Prevention Restoration Order and Beautification Enhancement.

Ang kapitan sa Labangon miingon nga daghan na kaayo siya og nadawat nga reklamo gikan sa mga lumulopyo sa Labangon nga sila makadaghan na nawad-an og mga butang nga gituohan nga gisakiyo sa mga basurero. (BANAT NEWS)