Namusil apan maoy napatay

CEBU, Philippines - Usa ka driver sa traysikad nga gipasanginlang namusil apan wala makaigo mao na hinuoy napatay dihang nailogan sa armas ug gilamba ang iyang ulo sa tawong iya untang pusilon tungod sa panaglalis sa duha sa sugal nga hantak.

Ang insidente nahitabo sa Barangay Inayawan niadtong Huwebes sa hapon diin usa ka Marzel Badana, 24, ang nakalas samtang ang suspek mao si Marlo Angga, 38, parehong mga residente sa maong barangay.

Subay sa imbestigasyon sa Homicide Section, si Badana ug Angga naghantak sa daplin sa dalan mga alas- 4 sa hapon dihang nagkalalis silang duha tungod sa singko pesos.

Si Badana  daling mipauli sa ilang balay sa sitio Pansang ug sa pagbalik nagdala na og armas apan sa iyang pagpusil kang Angga wala niya kini maigo hinungdan nga gilayog siya niini ug nadisarmahan.

Dihadiha matud pa gilamba ni Angga ang ulo ni Badana sa sementadong gutter sa dalan ug gipusposan ang ulo niini sa puloan sa armas nga nailog.

Ang biktima daling gidala sa Cebu City Medical Center apan gideklarar kining patay na tungod sa grabeng kadaot nga nahiaguman sa iyang ulo.

Ang suspek kinsa mikuyog sa pagdala sa biktima sa tambalanan gidakop sa mga sakop sa Pardo Police Station.

Usa ka deformed caliber .38 revolver nga dunay lima ka buhing bala nga gituohang iya sa biktima ang na-rekober diha sa crime scene ug usa ka basiyo niini ang nakuha diha gihapon sa maong dapit.

Ang suspek gikatakdang pasakaan og kaso tungod sa kamatayon sa biktima. (/EIM) (BANAT NEWS)