2 gipusil patay sa wala ilhing kriminal

CEBU, Philippines - Duha  ka  tawo  ang  gipamusil  patay  sa managlahing  lugar  ug  oras sa dakbayan sa  Lapulapu   sa miaging  gabii.

Ang  mga  biktima  mao  sila  si Genmar Oporto, 29, ulitawo  ug walay trabaho  nga  taga sitio  Soong II,  barangay  Mactan,  ug   Arthur  Basanta, 16, ulitawo, taga  sitio  Toril,  barangay  Canjulao,  pulos  sa dakbayan sa Lapulapu.

Si PO2 John Carlo Jocotan sa homicide section sa kapolisan  sa maong  dakbayan  nga nahinabi sa Banat News miingon nga ang mga estambay  ug mga molupyo sa sitio  Soong, maoy unang nakamatikod sa lanog nga boto sa armas sa  alas  9:00  ang takna  sa miaging  gabii.  Human   niini  nasigpatan   nila  ang awto nga mipabulhot sa pagpadagan pahilayo nga wala na maklaro ang plate number ug kolor  tungod sa kangitngit.

Matud pa niya nga nakita sa mga estambay ang patay’ng lawas sa biktima nga nagbuy-od sa daplin sa karsada nga naligo sa kaugalingon niining dugo. Si PO2 Jocotan miingon nga ang biktima nga may samad pinusilan sa iyang ulo  nagsul-ob pa gihapon sa iyang ball cup nga kawo.

Sa dihang ilang gikuha   ang  kawo, didto  ibutang ang usa ka paketeng shabu nga gipapilit pinaagi sa  masking tape.

Dugang pang  kasayoran  nga  ilang nakuha sa crime scene mao  ang kabhang sa kalibre 45 nga armas nga gituohang gikan  sa hinagiban sa wala hiilhing  kriminal.

Si PO2 Jocotan miingon nga ang kangitngit sa dapit nga nahitaboan sa  krimin maoy nag-unang hinungdan nga wala  hiilhi  sa  mga  nakasaksi  ang  kriminal. Samtang  si  Basanta  gipusil patay  sa alas  8:00  sa maong  gabii. Wala  gihapon hiilhi  ang  kriminal  kinsa  nagsakay  og  motorsiklo. Si PO2 Jocotan nga nahinabi sa Banat News miingon nga naglakaw pauli  sa ilang panimalay ang biktima dihang kalit lang gipusil ang tuong dughan niini.

Dayon  gibiyaan  sa kriminal  human    mobuy-od  sa karsada ang  biktima.

Dali   kining  gitabang  sa  mga  nakasaksi  ug  gidala ngadto  sa Lapulapu City District Hospital,  dayon  gibalhin  ngadto  sa  Vicente Sotto Memorial Medical Center sa dakbayan sa Sugbo. Apan matud pa ni PO2 Jocotan nga gideklarar kini sa mga doctor nga dead on arrival didto  sa VSMMC. (BANAT NEWS)