Shootout sa Talisay “kawatan” pata

CEBU, Philippines - Laing shootout nahitabo sa siyudad sa Talisay usa ka gidudahang kawatan patay sa police checkpoint kagabii diin usa ka gidudahang kawatan ang  giingong nakigpinusilay sa mga sakop sa Talisay City Police Station diha sa sitio Dawis, Ramona Village, barangay Cansojong, dakbayan sa Talisay.

Usa ka police checkpoint pinangulohan ni Senior Inspector Allan Cuizon, deputy chief sa Talisay City Police Station ang gibutang sa maong dapit dihang miagi si Jaime Telmoso, residente sa Lemonville, barangay Cansojong.

Matud pa nga si Telmoso luwan sa usa ka motorsiklo nga gimaneho sa usa ka Raymond Dela Victoria, 26, taga sitio Rona Kimberly, Cansojong. Apan dihang gipara sa mga polis, giingong kalit nga midagan si Telmoso hinungdan nga gigukod kini sa mga polis apan kalit kining namusil.

Tungod niini gibawsan kini og pusil ni PO1 Taher Radiab ug nahagba sa kalibonan. Nakuha gikan sa suspek ang usa ka kalibre .22 magnum revolver nga dunay pito ka mga buhing bala ug usa ka kabhang sulod sa chamber niini.

Usa ka puntil nga itom usab ang nakuha gikan sa iyang posesyon nga dunay laing walo ka buhing mga bala sa nahisgutang armas ug laing usa ka buhing bala sa kalibre .22 (ordinary), usa ka buhing bala sa kalibre 9mm ug usa ka sachet sa shabu ug duha ka rolled nga foil ug tissue paper. Sumala pa ni Superintendent Elmer Lim, officer-in-charge sa Talisay City Police Station nga base sa ilang nadawat nga report si Telmoso suspetsadong kawatan nga manaka og balay, gibuhian ra si Dela Victoria human masutang mi-hitch ride ra si Telmoso kaniya. (BANAT NEWS)