Solusyon sa kamatayon ni Ducayag hapit na

CEBU, Philippines - Gibutyag  kagahapon   ni  Regional Director  Antonio Pagatpat,  sa National Bureau of Investigation (NBI) nga sa dili  madugay hingpit na nga makab-ot sa pamilyang Ducayag ang hustisya nga ilang gipangita.

Kini tungod  kay  matud pa ni Pagatpat nga hapit na mahuman ang maong kaso ug   ang  ilang  gipaabot  mao  na lang   ang affidavit  ni Fe Solidad Ducayag,  ang inahan  ni  Mario Alfie  Ducayag,  ang suspetsadong  nangawat  og  tsinelas  sa Metro  Gaisano  apan giingong  namatay  sa kulata  sa  midakop  kaniya  sulod  sa maong tindahan.

Hinuon  misaad  na  ang  inahan  sa biktima   nga  motunol   sa iyang  affidavit   nga ipaagi   sa ilang abogado nga si Atty. Salvador Solima.

Samtang  gipaningkamotan sa NBI nga ma- follow-up ang  maong  affidavit aron  kahatagan og kalinaw ang pamilya nga  apektado  sa maong  hitabo.

Si Pagatpat mibutyag nga sa madugay ug sa madali mahibaw-an na unya ang kamatuoran apan sa pagkakaron dili pa siya makabutyag kung si kinsa ang suspek.

Sa sayo  pa  giingong  mga security  guard  sa maong tindahan  ang  nagkulata  hangtud  namatay  si Ducayag  apan  padayon  pa  kining  gisuta  sa NBI.

Ang NBI nangandam na sa tanang mga dokumento nga posibleng magamit alang unya sa pagsulbad sa maong kaso.

Karong hapon gikataho nga i-schedule na mismo  sa buhatan sa NBI ang requesting contract alang sa maong kaso, matud  pa ni  Pagatpat.  (BANAT NEWS)