Loot di makatuong napildi

CEBU, Philippines - Dili makatoo si Daanbantayan Mayor Ma. Luisa Loot sa Nacionalista Party (NP) sa iyang kapildehan sa subli niyang pagpapili niadtong Lunes nga eleksiyon batok sa bag-ong mayor nga si Engr. Augusto Corro sa Liberal Party (LP).

Matud pang Loot nga imposible kaayo nga siya mapilde sanglit aduna siya’y lig-ong organisasyon sa matag sityo samtang si Corro niabot gikan sa gawas sa nasud duha ka semana sa wala pa ang eleksiyon aron pagpangampanya.

“Bisan kinsa sa ako mga tawo di katoo nga ang mga tawo wa nibotar sa ako,” sumala pang Loot.Matud pa ni Loot nga sobra ra ang iyang kompiyansa ug mibasol sa mga depektosong   Precinct Count Optical Scan (PCOS) machines nga nakaingon sa iyang kapildehan. Gitun-an karon sa ilang kampo ang pagprotesta batok sa resulta sa eleksyon.

Si Loot dili pa mobiya sa politika hinoon iyang gamiton ang mosunod tulo ka tuig sa pagpangandam sa sunod eleksiyon.Unang napili si Loot isip bise-mayor niadtong 1995, mayor sa tuig 1998, 2001 ug 2004; bise-mayor sa 2007 ug mayor na usab sa 2010 nga eleksiyon.

Si Corro unang gipilde sa anak ni Loot nga si Bokal Sun Shimura, sa pagka-mayor niadtong 2007. Midagan pag-usab si Corro sa pagka-mayor sa 2010 apan gipilde na usab siya ni Loot.Giproklamar si Corro kagahapon human siya nakakuha og 18,101 botos batok ni Loot nga nakakuha og 15,700 ka botos.

Ang iyang kapares nga si konsehal, Atty. Gilbert Arrabis Jr. ang nidaug usab sa botos nga 18,534 batok ni Bise-Mayor Renato Te nga nakakuha og 13,462 ka botos.Gipasalig hinoon ni Loot nga iyang itugyan kang Corro ang pangagamhanan sa lungsod sa hapsay nga paagi uban ang panghinaut nga mapadayon ang nasugdan nga mga programa.Matud pa ni Corro nga usa ka enhinyero nga dakung kausaban ang makita sa katawhan ubos sa ilang administrasyon ni Arrabis nga usa ka abogado.

Kaalyado ni Corro nga bag-ong napiling konsehal mao sila si Chona de Leon ug Emmanuel Benatiro samtang nasublian sila si Zenaida Abucay, Bregitte Tancawan, Samuel Moralde, Marylou Pepito ug Juanito Ybañez; ug bag-ong napili si Jupiter Rosell nga kaalyado ni Loot. (BANAT NEWS)