Driver gipusil angol sa tulisan

CEBU, Philippines - Kritikal ang kahimtang sa usa ka taxi driver human kini pusila  sa wala  hiilhing mga  tulisan didto sa Sitio Timpolok, Brgy. Babag, dakbayan sa Lapulapu kagahapon sa kaadlawon.

Ang biktima mao si Jose Dindo Rota Caberos, 44, minyo, nga taga   Genes St.,  Brgy. Sawang Calero, dakbayan sa Sugbo ug driver sa CITI taxi nga adunay plakang GXU 119 ug body no. 5492.

Sa pasiunang imbestigasyon ni SPO2 Elmer Canillo ug SPO2 Allan Pantalleon   sa Lapulapu  Police Station nasayran nga  sa  mga ala 1:30 kagahapon sa kaadlawon duha ka tawo ang misakay sa taxi ni Caberos  kinsa  nagpahatod sa Deca homes.

Apan   pag-abot niini sa hilit  ug ngitngit nga dapit sa Sitio Timpolok,  kalit nga mideklarar og tulis ang duha ka pasahero.

Gumikan sa kahadlok   sa biktima  iyang nahatag ang iyang kinitaan  tungod  kay  gitionan   siya  og  armas de fuego apan  nasuko  ang  mga  tulisan kay  dihang  manaog  unta  sila  di  sila  makaabli  sa sira   kay  na-lock  kini sa biktima  hinungdan  nga  gipusil            siya .

Tungod  kay  wala  man  masayud  ang  mga tulisan  sa control  switch    sa  sira sa pultahan,  gibunalan  sa pul-an  sa ilang  armas  de fuego  ang  bildo  sa sira  ug  nanglusot  kini  nga  gibiyaan  ang  samaron  nga  drayber dayon  miikyas.

Ang  biktima  kinsa nasabak  sa  tuong  tampihak   gihatud  sa   mga  molupyo  sa maong  lugar  ngadto  sa Lapulapu City Hospital  apan  gibalhin  usab  dayon  kini  ngadto  sa Vicente Sotto  Memorial  Medical  Center  sa  dakbayan  sa Sugbo.

Hinuon  matud pa ni Lapulapu City Police Office Director P/SSupt. Rey Lyndon Lawas   nga ila nang nailhan ang mga suspek   ug  gitakda  nila  ang  pagpakita  sa  mga  dagway  niini ngadto sa biktima  aron  pagkonpirmar  kun mao  ba  kining  mga tawhana ang  mitulis  kaniya. (Bong Soriano, Romeo T. Limpangog ug Josephine D. Palingcod,CNU Intern/WC) (BANAT NEWS)