Joavan i-surrender ni Soc

CEBU, Philippines - Si Mayor Socrates Fernandez gikatakdang motugyan sa iyang anak nga si Joavan Fernandez ngadto sa kapolisan, kini maoy gibutyag ni Superintendent Elmer Lim, officer-in-charge sa Talisay City Police Station.

Si Lim nga nahinabi sa mga tigbalita kagahapon mibutyag nga nagkaestorya sila sa mayor pinaagi sa cellphone ug mipasalig nga karong Lunes uban sa ilang abogado itugyan niya ngadto sa mga polis si Joavan.

Apan samtang wala pa mosurender si Joavan giklaro ni Lim nga padayon gihapon ang ilang hot pursuit operation batok sa anak sa mayor kinsa gipasanginlang namusil sa usa ka Eduardo Largo Jr. diha sa San Isidro, Talisay City niadtong Huwebes sa kaadlawon.

Matud ni Lim nga ang saad sa mayor pagtahan sa iyang anak gisulti na usab niya kini ngadto sa hepe sa kapolisan sa probinsiya Senior Superintendent Patrocinio Comendador.

Karong Lunes gikatakdang pasakaan og kasong frustrated murder si Joavan diha sa piskaliya sa Talisay human nakaluwat na og affidavit ang biktima.

Matud pa nga nasuko si Joavan kang Largo dihang wala mohatag sa numero sa agalon niini sa gitrabahoang Danryan Marketing nga usa ka car shop diha sa Cebu South Coastal Road.

Si Largo kinsa nakaangkon og mga samad pinusilan sa iyang duha ka bukton nakagawas na kini sa tambalanan niadtong Biyernes sa hapon.

Human sa hitabo ang pamilyang Largo nabalaka sa siguridad sa ilang kinabuhi ilabi na sa tulo nila ka mga anak.

Si Lim nagkanayon nga bisitahon nila ang pamilyang Largo ug tan-awon niya kung unsay iyang mahatag nga tabang.

Sa laing bahin, base sa report si Joavan mipasangil nga dunay bulok sa politika ang pasangil batok kaniya ug si Largo giingong gigamit lang kini sa politiko aron pagdaot kaniya ug maapektohan ang iyang amahan kinsa mikandidato karon pagka- konsehal sa siyudad.

Apan si Largo nagkanayon nga bisan kanus-a wala siya magkuyog-kuyog og politiko diin ang iyang trabaho kaniadto pagpangarga lang diha sa Carbon Market ug nagmaneho og traysikad ug nalipay siya dihang gitanyagan siya og trabaho sa tag-iya sa car shop ug sweldohan og P1,000 ang semana.

Sa nahitabo kaniya karon magping-it na usab sa tumang kalisud ang iyang pamilya tungod kay dili man siya makatrabaho.

Nag-ungot pa sa bukog sa walang bukton ni Largo ang bala ug wala kini maoperahi. (BANAT NEWS)