Pagbalhin sa munisipyo init nga isyu sa Consolacion karong piniliay
CEBU, Philippines - Ang pagbalhin sa munisipyo sa lungsod sa Consolacion maoy nag-una sa init nga isyu nga lalisan sa mga kandidato sa 2013 election sa lungsod sa Consolacion.
Si Mayor Teresa Alegado nga nagpasubli sa katungdanan mipasabot nga tinguha niya nga matukod ang bag-ong munisipyo sa gikahimutangan karon sa Consolacion Sports Complex. Kini nagpasabot nga gub-on ang maong sports complex.
Apan kusganon kining gisupak ni kanhi mayor Avelino Gungob Sr. kinsa makig-atbang ni Alegado.
Si Alegado miingon nga naghuot na og maayo ang mga opisina sa karaang munisipyo mao nga dunay mga departamento nga nag-abang na lang og lawak sa usa ka building sa usa ka kooperatiba sa maong lungsod.
Si Gungob miingon nga kun kahatagan siya og kahigayonan nga mahibalik sa pagdumala sa renda sa pangagamhanan sa maong lungsod, didto niya ipatukod ang bag-ong munisipyo sa barangay Laray nga orihinal niyang gisugdan sa dihang siya pay mayor sa lungsod.
Ang plano ni Gungob gisupak ni Alegado tungod kay timberland pa man ang classification niini. (BANAT NEWS)
- Latest
