Diamante imbistigahonon sa Ombudsman

CEBU, Philippines - Mag-atubang  og  imbistigasyon si Mayor  Democrito  Diamante  sa  lungsod  sa  Tuburan  tungod  sa  usa ka akusasyon   bahin  sa  giingong gipatukod  niyang  mga proyekto  nga  walay  pagtugot  sa konseho sa lungsod .

Ang  suwat  nga  gipadangat  ngadto  kang Visayas  Deputy Ombudsman Pelagio Apostol  kansang  kopya  gipaambit  usab kang Regional Director Sabeniano Cabatuan  sa Commisson  on Audit (COA)  gikan  kang Sangguniang Bayan  member  Marie Segarra Tabotabo, gitumbok  niini  ang   mga  anomaliya  nga nahimo  ni Mayor Diamante  sa pagdumala  niini  sa lungsod  sa Tuburan.

Pipila  niini  mao  ang  giingong  pagbaton  sa pamilya  sa  mayor   sa  usa  ka tindahan nga  maoy  kuhaanan  og  supply alang  sa  panginahanglanon  sa lungsod nga  dili na  mag-agi  og  subasta.

Gani  usa  kuno sa  gi-supply  niini mao  ang usa ka heavy equipment nga  mibalor  og  minilyon  ka pesos  apan  usa  diay  ka surplus  busa  naguba  lang  dayon  pipila  ka  semana  human  kini  mapalit.

Gumikan  niini  giawhag  ni   Tabotabo  sa  iyang  suwat  ang taga  Ombudsman  ug  ang taga COA  sa  pag-imbestigar  niini  diin  kun mamatud-an  kinahanglang  pasilotan  ang  nagbuhat  sa maong  salaod.

Gawas  niini, gibutyag  usab   sa suwat ni Tabotabo  nga  namalit  og medisina  ang  kagamhanan  sa lungsodsa kantidad   nga dul-ang  P2 milyones   nga wala  gihapoy  kalibotan  ang  konseho.

 Apan   ang  maong  mga  medisina  dili   makuha  sa  mga health  center  sa  lungsod isip Aids  to Individuals in Crisis Situation (AICS)  kay  anaa  kini  ibutang  ubos   sa buhatan  sa mayor (office  the  mayor)  ug  busa  ang  mayor  ra  ang  may  gahum  nga magbuot  kun kinsay  hatagan  niini.

Gani  matud  pa  ni Tabotabo  nga may mga  higayon  nga  ang  mga  dili  dumadapig  sa  mayor  papaulion  na  lang  ug  balibaran  nga wala  nay  medisina  kay  wala  nay budget  o  kaha  hatagan  na lang  og  P50 nga  ipapalit  og paracetamol.

Apan  sa bahin  ni  Diamante,  igo  lamang  kining  mipadayag  nga  mga  Tuburanon  na  maoy mopasabot  bahin  sa mga kaayohang  iyang  gihimo  sa iyang  mga  konstituwente  sa Tuburan.

Kanunay  niyang  gipasigarbo  nga  migasto  siya  sa kaugalingon  niyang  kuwarta  sa  pagpatukod  sa Tuburan  Boulevard,  gasto  sa  medical mission, scholarship program, Christmas Tree  at  the park,  mga ganti  kun  adunay  mga  kalingawan  ug  uban  pang kalihokan  sa lungsod. Sa laktud  ang  mayor  nagkanayon  nga walay  igong basehanan  ang  gipahayag  ni  Tabotabo  sa suwat  niini. (BANAT NEWS)