Talisay wa ma -clear sa ilegal nga sugal — Lim
CEBU, Philippines - Dakbayan sa Talisay wala pa ma-clear sa ilegal nga sugal matud sa officer-in-charge nga si Superintendent Elmer Lim.
Si Lim mibutyag nga sa probinsiya ang dakbayan sa Talisay ug Toledo ug lungsod sa Minglanilla wala pa kini ma-clear sa ilegal nga sugal sama sa masiao.
Gipasabot ni Lim nga kanunay ang ilang subsob nga operasyon batok sa tanang klase sa ilegal nga sugal.
Dunay mga operatiba nga gikan sa provincial headquarter nga magpahigayon og test-buy o mopalit og masiao diha sa mga lugar ug kung makapalit pa gani kini dili pa madeklara ang usa ka lungsod nga clear sa ilegal nga sugal.
Matud ni Lim nga bisan unsa nila og subsob sa operasyon duna gyu’y mga magtago-tago og baligya hinungdan nga labaw na nilang gihugtan ang ilang operasyon karon batok sa ilegal nga sugal.
Subay sa hugtanong operasyon sa kapolisan batok sa ilegal nga sugal niadtong Huwebes sa gabii usa ka giingong usher ug usa ka coordinator og masiao ang nasikop sa mga polis.
Ang mga suspetsado mao sila si Danilo Dacillo, 52, taga sitio Molave, Tabunok ug Carlita Abaquita, 58, taga sitio Mananga, Tabunok.
Naimbargo nila ni SPO1 Mikie Espina, PO3 Benedicto Lasque, PO2 Roy Lofranco, PO2 Stephen Sefuesca ug PO1 Edwin Campomanes ang mga paraphernalia sa masiao gikan sa mga suspetsado.
Kagahapon sa buntag ang duha gikatakdang pasakaan og kasong kalapasan sa Akta Republika 9287 kon “an act increasing the penalties for illegal numbers & its implementing rulesâ€. (/WC) (BANAT NEWS)
- Latest