Salud gitangtang sa lista sa mga kandidato

CEBU, Philippines - Hingpit nang gitangtang sa Commission on Election ang ngalan ni Rex Ong Salud nga naila nga si Wakee Salud gikan sa listahan sa mga kandidato sa pagka-mayor sa lungsod sa Cordova sa umaabut nga election. Kini human ipakanaug ang desisyon sa COMELEC en banc ang resolution number 9614 niadtong Enero 15, 2013 nga nagbasura sa petisyon ni Salud.

Sa  maong resolusyon  nagmando   sa pagkanselar sa Certificate of Candidacy ni Salud ug  sa pagwagtang niini gikan sa Certified List of Candidate sa election karong Mayo 13, 2013 tungod sa kapakyas niini sa pagtuman sa nag-unang kwalipikasyon isip elective local office nga mao ang residency requirement.

Ang tulo ka pahina nga resolusyon sa COMELEC en banc nga gipirmahan nila ni COMELEC chairman Sixto Brillantes Jr, ug mga commissioner nga sila si Rene Sarmiento, Lucenito Tagle, Armando Velasco, Elias Yusoph, Christian Robert Lim ug Maria Gracia Cielo Padaca.

 Sa maong resolusyon, ang COMELEC miingon nga ilang gisagop ang desisyon sa  Regional Trial Court Branch 28 sa siyudad sa Mandaue niadtong Oktobre 1, 2012 nga nagbasura sa COMELEC registration ni Salud tungod sa kapakyas niini sa pagkuha sa residency requirements nga 6 ka bulan nga pagpuyo sa lugar nga iyang lansaran.

 Sa 51 ka mga gideklarar nga nuisance candidate, 9 niini ang taga Cebu nga gilangkuban nila ni Lea Remedios Ong ug Miguel Gonzalve Selim pulos kandidato pagka-mayor sa siyudad sa Sugbo, Bert Leo Abella kandidato sa pagkakonsehal sa Cebu City North District, Ricardo Nacor Adlawan kandidato sa pagkakonsehal sa Cebu City South District, Jose Cida Cane kandidato sa pagkakonsehal sa Cebu City North District, Gumersindo Canoy Canete sa pagkakonsehal sa Cebu North District ug Erlinda Sy Sollano kandidato sa pagkakonsehal sa Cebu City North. (BANAT NEWS)