Mamuhatay og peke nga dokumento nasikop sa NBI

CEBU, Philippines - Usa ka 40-anyos ang gidakop sa mga sakop sa National Bureau of  Investigation (NBI)-7 adtong miaging Lunes sa Sanciangko Street, Cebu City sa pagpanghimo og peke nga dokumento.

Si NBI agent Atty. Bernard dela Cruz nagkanayon nga si Rey Vincent Rosas nadakpan sa usa ka buy-bust operation alas 3:30 sa hapon sa milabay’ng adlaw.

Sumala pa ni dela Cruz nakadawat sila og request gikan ni Land Transportation Office (LTO)-7 Director Raul Aguilos nga naghangyo sa pagpa-imbestigar kabahin sa peke nga accountable forms sama sa official receipts (OR) ug certificate of registration (CR) sa mga sakyanan.

Matud niya gipakita pa gani sila sa mga peke nga OR ug CR. Sulod sa usa ka buwang surveillance, ilang gilusad ang entrapment operation batok ni Rosas diin si dela Cruz nagpahimo kang Rosas og OR ug CR.

Sumala pa nga mibayad si dela Cruz og P1,000 sa serbisyo ni Rosas, dangtan og duha ka oras nahuman ang susama sa orihinal nga OR ug CR.

Si Rosas maoy nanag-iya sa Rosas Computer Assistance nga tulo ka tuig nang nag-operate sa maong dapit.

Nasakmit usab sa NBI ang nagkalain-laing mga dokumento sama sa mga diploma, transcript of records, bank certificates ug uban pa. Gisakmit usab hasta ang computer sets ni Rosas nga gigamit sa iyang pagpa-meke.

Si dela Cruz miingon nga  ilang pasakaan og kasong paglapas sa Article 172 sa Revised Penal Code o falsification by private individual and use of  falsified documents si Rosas. (BANAT NEWS)