CEBU, Philippines - Lima ka nagpadagan og masiao ang nasikop sa kapolisan dihang gironda niini ang ilang buhatan didto sa sitio Pilit, barangay Cabangcalan, dakbayan sa Mandaue sa miaging gabii.
Ang mga nasikop sa mga sakop sa Regional Special Operation Group (RSOG) mao sila si Jerry Cabilao, 39, Roger Dizon, 29, Oscar Lactao, 55, Jayme Orcia, 36 ug Ramil Gomez,19.
Matod pa ni Deputy Chief Insp. Romeo Sentinta sa RSOG nga usa sila ka semanang naniid sa maong grupo human nila madawat ang impormasyon kalabot sa illegal numbers game nga nagpadayon sa maong lugar.
Sa ronda nga ilang gilusad, nasakpan gayud sa akto ang lima nga busy kaayong nag-tally sa mga nadawat nilang numero gikan sa mga suki nilang sugarol ug wala makabantay sa pag-abot sa kapolisan.
Nasakmit sa kapolisan ang siyam ka fax machine, tulo ka nirolyong fax paper, tulo ka calculator ug nagkadaiyang tally sheets.
Dugang pa ni Sentinta nga ila pang gisubay kun si kinsa ang financier sa lima nga suspetsado aron usab ila kining masikop.
Gibutyag usab ni Sentinta nga susama sa nahutdan na sila og paglaum sa nahisgutang grupo apan maayo na lang kay aktibo kaayo nga nakig-alayon kanila ang mga sakop sa barangay intelligence network (BIN).
Samtang giangkon sa mga suspetsado nga napgos sila sa pagsagop sa ilegal nga sugal gumikan s a ilang kalisud sa panginabuhi.
Kasong kalapasan sa Republic Act 9287 kon Anti-illegal Numbers Games ang posibling ipasaka batok sa lima ka mga dinakpan. (BANAT NEWS)