Tawo naputos og dinunggaban napalgan sa siyudad sa Talisay

CEBU, Philippines - Usa ka wala mailhing patay’ng lawas nga naputos sa samad dinunggaban ang napalgan niadtong Miyerkules sa gabii diha sa sitio Ranger, barangay Pooc, dakbayan sa Talisay.

Si Ryan Navarro, 28-anyos, taga sitio Laray, barangay Mohon Talisay ang mi-report sa kapolisan kabahin sa insidente human niya mabangali ang patay’ng lawas diha sa maong dapit.

Ang nahisgutang patay’ng lawas gihulagway sa mga polis nga gibana-banang nagpanuigon sa 30-anyos, 5’4 ang gitas-on sa pamarog, puti-on og pamanit, yagpison og lawas, nagsul-ob og kolor itom nga short ug sweat shirt nga stripe itom ug puwa.

Sa imbestigasyon nila ni PO3 Benedicto Lasque ug PO3 Ferdinand Pablo walay nakaila sa biktima diha sa maong dapit.

Gituohan sa mga polis nga posibleng ang biktima ug ang kriminal nagkuyog sa pag-anha sa lugar.

Matud ni Lasque nga ilang nabantayan diha sa nahimutangan sa patay’ng lawas dunay timailhan nga ang biktima misukol kini sa midunggab kaniya ug gituohang gigunitan niini ang kutsilyong gigamit sa kriminal og dunggab tungod sa mga hiwa niini sa duha ka kamot.

Gituohan usab sa mga polis nga ang kriminal dunay grabeng kasuko ngadto sa biktima tungod kay natusak sa mga samad dinunggaban ang maong patay’ng lawas.

Na-recover sa mga polis gikan sa lugar nga nahitaboan ang usa ka paresan sa stripe blue nga tsinelas ug usa ka brown sandal nga walay pares nga gituohang iya sa kriminal.

Ang kapolisan nagpahigayon og follow-up nga operation sa hitabo. (Brenda D. Batuto/EIM) (BANAT NEWS)