Magpale ug garbo gikiha sa taga sugbo TV

CEBU, Philippines - Ang mga kawani sa Sugbo  tv pormal nga mipasaka og kaso batok ni acting governor Agnes Magpale, PRO-7 regional director Marcelo Garbo, Supt. Leopoldo Cabanag, Atty. Czareem Joseph Estella ug ubang mga kapolisan gikan sa Regional Public Safety Battalion 7 ngadto sa Ombudsman Visayas.

Mga kasong grave abuse of authority, grave misconduct, oppression, conduct unbecoming of a public officials ug violation of Republic Act No. 3019 Sec 3 (a) and (e) ug grave coercion maoy gipasaka ni Rowena Zulueta, ang Channel Head, ug Rufo Carzano, reporter sa Sugbo tv batok ni Magpale ug mga kaubanan.

Ang kaso gibase sa kalit nga pagpasira sa Sugbo tv ug Sugbo News niadtong Disyembre 21, 2012 pipila ka adlaw human suspensoha sa presidente sa nasud si gobernador  Gwendolyn  Garcia nga gibase sa giingong huyang kaayong  mga reklamo.

Si Zulueta ug Carzano mitumbok sa ilang gipanumpaang pamahayag nga illegal ang pagpasira ug pag-undang sa operasyon sa Sugbo tv nga walay gipakitang kamandoan gikan sa korte ug wala usay nakitang kalapasan bisan pa man og kini gipadagan  sa kagamhanan sa lalawigan sa Sugbo pinaagi sa pagpaningkamot  sa nasuspensong  gobernador.

Gitug-an niini nga niadtong Disyembre 21, si Zulueta ug Katrina Tabanao ang operation manager sa Sugbo Tv gipatawag ni Magpale ug gituki ang bahin  pagpasira sa Sugbo Tv.

Apan sa pagbalik nila sa buhatan   nga nakigtagbo   sa  mga  kawani  sa  Sugbo Tv, ang mga tawo ni Magpale  nga  gipangulohan ni  manlalaban  Estella uban ang mga kapolisan kalit nga niabot sa buhatan sa Sugbo tv ug mimando sa pagpasira sa maong  estasyon  ug dayon  gisunod ang   pagpatak-op  sa Sugbo News, dayon giguba  ang  kandado sa van nga gisudlan sa satellite feed sa Sugbo tv, dayon gipawong  kini  ug        gipadlakan.

Sigun pa sa duha, nga  nangahadlok kaayo ang mga kawani sa gihimo sa acting gobernador ug  ang  mga tawo niini lakip na ang mga kapolisan. (WC) (BANAT NEWS)