P10 mil bonus sa mga titser gihatag apan nalangay

CEBU, Philippines - Mga 4,700 ka magtutudlo sa publikong tunghaan sa dakbayan sa Sugbo ang naghuwat tibuok adlaw kagahapon alang sa ilang P10,000 nga bonus gikan sa Cebu City Hall.

Kasagaran sa mga magtutudlo pasensiyoso kaayo kining naghuwat hangtud nahatag ang ilang yearend bonus kagahapon sa hapon.

Ang magtutudlo sa fourth year high school sa Abellana National School nga si Marieta Penetrante nagkanayon nga maghuwat gyud siya bisan pa og maabtan sa sunod adlaw tungod kay daku na kaayong tabang ang P10 mil nga ilang madawat.

Si Penetrante sulod na sa 40 ka tuig nga nagtudlo ug matud niya nga unang higayon nila karon nga makadawat sa maong kantidad sa yearend bonus.

Ang pag-release sa ilang bonus karon kaduha na kini ma-postponed.

Apan kung dunay nakapaabot, dunay ubang mga magtutudlo nga misaway sa sitwasyon ug matud nila walay taga city hall nga mihatag nila og update aron unta dili sila maghuwat og dugay.

Si Mayor Michael Rama sa iyang bahin, nagkanayon kini nga dili siya gustong mobasol ug misaad kining human sa New Year mopahigayon kini og imbestigasyon kung unsay hinungdan sa pagkalangan og panghatag sa bonus sa mga magtutudlo.

Gibutyag sa mayor nga dunay laing mga kamot ang buot mopugong sa pagpanghatag sa bonus ug gisabotahe ang maong kalihokan.

Si Atty. Johnsons Hontanosas sa special counsel for legal matter nagkanayon nga wala untay mahitabong distribution kagahapon sa bonus kung wala pa sila moadto sa bangko aron mahilot ang sitwasyon.  (BANAT NEWS)