Christmas party sa Toledo malampuson

CEBU, Philippines - Milampuson ang Christmas party sa Association of Barangay Captains  ug Barangay officials sa syudad sa Toledo niadtong Biyernes.

Matud pa ni Mayor Aurelio Espinosa sa Toledo nga gatusan ka mga  official gikan sa 38 ka mga barangay  sa maong syudad ang mitambong sa maong kalihokan.    Lakip usab sa miduyog sa maong kalihokan mao ang mga sakop   sa konseho sa maong syudad nga gipangulohan ni Vice Mayor Arlene Zambo. Matud pa sa mayor nga natagbaw  ug nalingaw  gayud ang tanang  nanambong  sa maong  party  nga  gipahinungod  sa  maabtik  kaayong mga opisyal  sa barangay nga  iyang  mga  kaabag  sa buhat  sa pag-atiman  sa  mga  molupyo  sa Toledo.

Alang  sa mayor nga ang mga  panagkatigom  nga  ingon  niini mohatag  usab  og kadasig  di lamang  sa mga  opisyal  sa barangay   ug  sa syudad  kundi bisan  pa  sa mga  molupyo  nga makasud-ong  sa  panaghiusa  sa tanang  opisyal  sa  kagamhanan  sa maong  dakbayan  alang  sa kaayohan  sa tanan.

Gani mitambong  usab  sa maong kalihokan si Gobernador Gwendolyn Garcia ug  si Kongresista  Pablo John Garcia  sa ika-tulong distrito  sa lalawigan  sa Sugbo. (Chester Abadilla/WC) (BANAT NEWS)