VM Garcia mihimakak sa pasangil

CEBU, Philippines - Gipanghimakak ni Vice Mayor  (VM) Marlon Garcia ang  pasangil  nga   may  mga  molupyo  sa Barili nga nasagmuyo  bahin  sa aircon bus  nga  iyang  gipiyal  ngadto  sa buhatan  sa Association  of Barangay Captains (ABC) imbis adto  sa buhatan  sa mayor.

Matud  pa  ni  Garcia  nga kun may nasagmuyo  man, “way lain  gawas kang  Mayor Teresito Mariñas”.

Miingon  siya kinahanglang  magbaton  og  delikadesa  ang  mayor kay  ang  kapakyas  niya  pagdala  sa maong  sakyanan  bisan gipugos  niya  pagkuha  ang yawe niini  sa didto  pa  kini  sa parkinganan  sa plaza  sa barangay  Tubigag Manok  sa  Asturias,  usa  ka  timaan  nga  dili  alang  kaniya  ang  maong aircon bus.

Gipasabot  ni  Garcia  nga  dili  siya  motuo  nga  may  mga molupyo  nga nasagmuyo  sa maong  isyu tungod  kay  ang  labing  naningkamot  nga  mapaanindot  ang  lungsod  sa Barili nunot  sa proyekto  nga eGWEN, hinungdan nga  nahimong   usa  sa nag-una  nga “top ten” sa  tibuok  lalawigan, mao  ang  mga  kapitan  sa barangay.

“Unya  kinsa  mang  kapitana  ang  masagmuyo  nga  sa 42 ka kapitan  sa Barili  nga sakop  sa ABC ako man  ang  39 ug  ang 3 mao ray  iya kang Mariñas,” sumala pa  ni Garcia.

Busa  alang  sa  bise mayor  nga  makatarunganon  lang  nga  ang  mga sakop  sa ABC  maoy  mogamit  sa aircon bus  nga  gihatag  sa Kapitolyo tungod  kay  sila  ang  naningkamot  nga  motunhay  ug  molampos  ang eGwen program  sa maong  lungsod.

Sayo niini  miapud-apod  si Gobernador Gwendolyn Garcia og  26 ka aircon bus  sa 26  ka lungsod   sa lalawigan  nga milampos  sa proyekto  nga  eGWEN.

Kini  mao  ang  pagpatahom  sa matag  lungsod  pinaagi  sa pag-atiman  sa kahinlo  sa palibot  ug  ang  pagpananom  og  mga  maanindot  kaayong  tanom  sa  kadaplinan  sa ilang  highway  sa tuyo  nga  labing  makapadani  og  mga turista. (BANAT NEWS)