Job fair sa Capitol buksan

CEBU, Philippines - Gatosan ka mga trabaho sa gawas sa nasud  ang ma-aplayan sa mga nangita og trabaho sa Public Employment Service Office ( PESO) Capitol  sulod niining semanaha.

Ang Peridot International Resources Inc.(PIRI) nakigtambayayong sa kagamhanan sa lalawigan sa Sugbo pinaagi sa PESO Capitol sa pagpang-recruit og  mga trabaho alang sa gawas sa nasud.

Gumikan kay wala man sila’y sangang buhatan dinhi sa Sugbo, ang buhatan sa PESO Capitol mao ang gigamit nga venue sa nahisgutan nga ahensiya sa ilang pagpang-recruit og mga trabahante sa gawas sa nasud sulod na sa dugay na nga panahon. Gipahibawo ni PIRI  President Raquel Espina Bracero ang mga bakanteng trabaho nga ma-aplayan sa mga job seekers kasagaran  atua  sa Bahrain ug  Dubai

Sigun pa ni  Bracero nga may dagkong mga hotel  nga bag-ong natukod sa Bahrain ug  ingon sa Dubai nga nanginahanglan og mga service crew   nga pabor  kaayo  sa  mga  aplikante  nga taga  Sugbo.

Ang usa sa mga aplikante sa pagka-waiter  nga si Rajiv Balatero Renane miingon nga daku gayud kaayo og kapuslanan sa mga job seeker  ang nahisgutan nga kalihukan sa PESO Capitol  gawas sa napasiugdahan niini nga overseas  job  fair. Kahinumdoman nga nagmalampuson ang katapusan nga overseas job fair nga gipasiugdahan sa PESO Capitol didto sa Cebu International Convention Center niadtong Oktobre 21 ning  tuiga  atol sa canonization ni  San Pedro Calungsod.

Gipahibawo ni Capitol Consultant on Labor Market Information Dr. Mathea Baguia nga dul-an sa 50  ka mga aplikante sa hotel ug restaurant  sa Dubai ug Qatar  ang na-hire on the spot sa nahisgutan nga overseas job fair gumikan sa presensiya sa mga foreign interviewer sa tulo ka mga recruitment agency. Dul-an sa dos mil ka mga aplikante ang mipahimulos sa naasoy nga job fair  nga  gitunol  usab sa PESO Capitol   ngadto sa nagkada-iya nga mga recruitment agencies.

Matud ni Dr. Baguia nga  in-demand kaayo  ang mga babaye nga aplikante sa gawas sa nasud niining panahona base sa talaan sa mga mi-apply sa labing awahi nga job  fair  alang sa gawas sa nasud.

Gawas sa trabaho, napahimuslan usab ang One Stop Shop nga serbisyo sa mga ahensiya sa goberno diin kapin sa usa ka gatos ang nakalukat og NBI Clearance, kapin sa usa ka gatos ang na-serbisyohan sa TESDA alang sa Skills Acquisition and Training ug dul-an sa 200 ang na-serbisyohan usab sa DFA alang sa  passport, NSO, PhilHealth ug SSS. (BANAT NEWS)