Pangilkil sa sakop sa TFA dakong pakauwaw

CEBU, Philippines - Wala molaban ang kadagkoan sa Task Force Alpha (TFA) sa usa nila ka sakop nga nadakpan sa kapolisan sa akto sa pagpangilkil sa iyang dinakpan.

Si Yolando Solibio nga maoy presidente sa TFA, usa ka non-government organization nga gi-accredit sa Land Transportation Office (LTO), miingon nga ang gihimo ni Engilbert Caumeran nakapauwaw kaayo sa ilang grupo.

Matud ni Solibio nga ang mga opisyal sa TFA nagtinarung sulod na sa 12 ka tuig ug ang mga sakop niini kanunay’ng gipahimangnoan nga magtinarung sa katungdanan.

Si Caumeran wala mananghid nga moapil sa checkpoint operation nga gihimo sa kapolisan didto sa dalan Echavez kaniadtong Nobiyembre 3 ug dunay tawo nga nagmotor nga nasakpang expire na ang lisensya.

Ang kapolisan mitugyan sa maong tawo ngadto kang Caumeran apan inay isyuhan og Temporary Operators Permit, igo ra nga gisakmit ang lisensya ug ang plate number sa motor.

Kaniadtong Miyerkules sa gabii, si Caumeran gidakop sa kapolisan kay ang dinakpan misumbong nga siya buot kilkilan sa maong deputized agent. Si Caumeran hugtanong mihimakak sa alegasyon batok kaniya.

Si Caumeran nga gipriso pa gihapon pagkakaron ug gipasakaan na og kaso ug gitaktak na sa iyang pagka-deputized agent sa LTO. Matud ni Solibio nga dako kaayo ang pagpakauwaw nga gihimo ni Caumeran sa grupo.

Tungod sa maong hitabo, gipahugtan pa ang kaestrikto sa pagkuha og mga sakop alang sa TFA. Ang mga sakop gipangitaan na og mga certifications gikan sa ilang mga gitrabahoan aron pagsiguro nga duna gyud sila’y         trabaho.

Matud ni Solibio nga dili na nila dawaton bisan kadtong mga dunay trabaho apan gagmay ra og sweldo aron pagsiguro nga ang ilang mga sakop dili na mangilkil.

Gipasalig ni Solibio nga ang TFA padayon gihapon nga moserbisyo pagdakop sa mga masalaypong drayber ug miawhag sa katawhan nga dili sila iratsada sa pagduda nga pulos naghimo’g binuang. (BANAT NEWS)